കൊച്ചി : തയ്യല്ക്കട ഉടമയുടെ കഴുത്തിലെ ഞരമ്പ് ബ്ലേഡ്കൊണ്ട് മുറിച്ച് കൊലപ്പെടുത്താന് ശ്രമിച്ച കേസില് പ്രതി അറസ്റ്റില്. മട്ടാഞ്ചേരിയില്നിന്ന് വന്ന് കറുകപ്പിള്ളി ഭാഗത്ത് വാടകക്ക് താമസിക്കുന്ന ചെട്ടിയാട്ട്പറമ്പ് വീട്ടില് ഷഫീഖാണ് (എപ്പി ഷഫീഖ് 35) അറസ്റ്റിലായത്. കലൂര് സെന്റ് ആന്റണീസ് പള്ളിക്ക് സമീപം സ്റ്റൈല് ഫിറ്റ് എന്ന തയ്യല്ക്കട നടത്തുന്ന മാത്യുവിനാണ് ആക്രമണത്തില് പരിക്കേറ്റത്. ശനിയാഴ്ച വൈകീട്ട് പള്ളിക്ക് സമീപം ലോട്ടറിക്കച്ചവടം നടത്തുന്നയാളെ ആരോ ദേഹോപദ്രവം ഏല്പിച്ചത് ചോദിക്കാന് എത്തിയ ഷഫീഖ് തയ്യല്ക്കടയില് ഉണ്ടായിരുന്ന മാത്യുവിനോടും സുഹൃത്തുക്കളോടും വാക്തര്ക്കത്തില് ഏര്പ്പെട്ടിരുന്നു.
ഈ സമയം സമീപത്തുണ്ടായിരുന്നവര് ചേര്ന്ന് പിടിച്ചുമാറ്റി. തുടര്ന്ന് വൈകീട്ട് ഏഴോടെ കട അടച്ച് വീട്ടിലേക്ക് പോയ മാത്യുവിെന്റ പിന്നാലെയെത്തിയ ഷഫീഖ് ബ്ലേഡ്കൊണ്ട് കഴുത്തില് വരയുകയായിരുന്നെന്ന് പോലീസ് പറഞ്ഞു. മാത്യുവിനെ സുഹൃത്തുക്കള് ചേര്ന്നാണ് എറണാകുളം ലിസി ആശുപത്രിയില് എത്തിച്ചത്. ഐ.സി.യുവില് ചികിത്സയിലാണ്. മാത്യുവിന്റെ സുഹൃത്തിന്റെ പരാതിയില് എറണാകുളം ടൗണ് നോര്ത്ത് പപോലീസ് വധശ്രമത്തിന് കേസ് രജിസ്റ്റര് ചെയ്തിരുന്നു. കറുകപ്പിള്ളി ഭാഗത്തുനിന്നാണ് ഇയാളെ അറസ്റ്റ് ചെയ്തത്. പോലീസുകാരനെയും ബാര് ജീവനക്കാരനെയും കുത്തിപ്പരിക്കേല്പിച്ച കേസുകളിലും പ്രതിയാണെന്നും പോലീസ് പറഞ്ഞു. കോടതി അഞ്ച് വര്ഷം ശിക്ഷ വിധിച്ചെങ്കിലും അപ്പീല് ജാമ്യത്തില് കഴിഞ്ഞുവരുകയാണ്. നിരവധി മോഷണക്കേസിലും പ്രതിയാണ്. പ്രതിയെ കോടതി റിമാന്ഡ് ചെയ്തു.
