ചെന്നൈ: താരാധന മൂത്ത് സുഹൃത്തുക്കളായ യുവാക്കള്‍ തമ്മിലുണ്ടായ തര്‍ക്കം അവസാനിച്ചത് കൊലപാതകത്തില്‍. തമിഴ്നാട്ടിലെ വില്ലുപുരത്താണ് നാടിനെ നടുക്കിയ സംഭവമുണ്ടായത്. വിജയ് ആരാധകനായ യുവരാജ് (22) ആണ് മരിച്ചത്. സംഭവത്തില്‍ രജനി ആരാധകനായ ദിനേശ് ബാബുവിനെ പോലീസ് അറസ്റ്റ് ചെയ്തു. ചൊവ്വാഴ്ചയാണ് കൊലപാതകം നടന്നതെങ്കിലും സംഭവം പുറത്തറിയുന്നത് വെള്ളിയാഴ്ചയാണ്.
മദ്യലഹരിയിലായിലാണ് യുവാക്കള്‍ തമ്മില്‍ തര്‍ക്കമുണ്ടായത്. കോവിഡ് ദുരിതാശ്വാസത്തിന് ഏത് നടനാണ് കൂടുതല്‍ പണം എന്നതിനെ ചൊല്ലിയായിരുന്നു ഇരുവരും തമ്മില്‍ തര്‍ക്കം. തര്‍ക്കത്തിനൊടുവില്‍ മരിച്ച യുവരാജിനെ അറസ്റ്റിലായ ദിനേശ് ശക്തമായി പിടിച്ചുതള്ളി. തലയടിച്ച്‌ നിലത്ത് വീണ യുവാവ് തല്‍ക്ഷണം മരിച്ചുവെന്നാണ് പോലീസ് റിപ്പോര്‍ട്ട്. ലോക്ക്ഡൗണ്‍ സമയമായതിനാല്‍ തമിഴ്നാട്ടില്‍ മദ്യശാലകള്‍ എല്ലാം അടഞ്ഞുകിടക്കുകയാണ്. ഇവര്‍ക്ക് എവിടെ നിന്നാണ് മദ്യം ലഭിച്ചതെന്നും പോലീസ് അന്വേഷിക്കുന്നുണ്ട്. താരാധനയുടെ പേരില്‍ അക്രമങ്ങള്‍ നിരവധിയുണ്ടാകുന്ന സംസ്ഥാനമാണ് തമിഴ്നാട്. മുന്‍പും ഇത്തരം സംഭവങ്ങള്‍ സംസ്ഥാനത്തിന്‍റെ വിവിധ ഭാഗങ്ങളില്‍ റിപ്പോര്‍ട്ട് ചെയ്തിട്ടുണ്ട്.
