തിരുവനന്തപുരം : നന്തൻകോട്ട് മൂന്ന് നില കെട്ടിടത്തിന് മുകളിൽ നിന്ന് വീണ് യുവാവ് മരിച്ച സംഭവത്തിൽ ദുരൂഹതയെന്ന് റിപ്പോർട്ട്. തൃശ്ശൂർ സ്വദേശിയായ നിതിൻ (27) ആണ് മരിച്ചത്. സംഭവവുമായി ബന്ധപ്പെട്ട് നിതിനൊപ്പം താമസിച്ചിരുന്ന സുഹൃത്തിനെ മ്യൂസിയം പോലീസ് കസ്റ്റഡിയിലെടുത്ത് ചോദ്യം ചെയ്തു വരികയാണ്. നന്തൻകോട്ടെ ഒരു വാടക വീടിന്റെ മുകളിൽ ഇന്നലെ രാത്രി നിതിനും സുഹൃത്തും ഒരുമിച്ചിരുന്ന് മദ്യപിച്ചിരുന്നതായി പോലീസിന് സൂചന ലഭിച്ചിട്ടുണ്ട്. ഇവർ തമ്മിൽ നേരത്തെ തന്നെ ചില അഭിപ്രായ വ്യത്യാസങ്ങൾ ഉണ്ടായിരുന്നതായും പോലീസ് പറയുന്നു.
നിതിനെ കെട്ടിടത്തിന് മുകളിൽ നിന്ന് തള്ളിയിട്ടതാണോ എന്ന കാര്യത്തിൽ പോലീസിന് സംശയമുണ്ട്. മരണവിവരം സുഹൃത്ത് നേരിട്ട് പോലീസിനെ അറിയിക്കുന്നതിന് പകരം വീടിന്റെ കെയർ ടേക്കറെയാണ് അറിയിച്ചത്. ഈ നടപടി പോലീസിൽ കൂടുതൽ സംശയങ്ങൾ ജനിപ്പിച്ചിട്ടുണ്ട്. മ്യൂസിയം പോലീസ് സുഹൃത്തിനെ കസ്റ്റഡിയിലെടുത്ത് ചോദ്യം ചെയ്തു വരികയാണ്.
