കൊച്ചി : സ്വര്ണക്കടത്ത് കേസിന്റെ അന്വേഷണവുമായി ബന്ധപ്പെട്ട് എന് ഐ എ സംഘം ദുബായിലേയ്ക്ക് തിരിച്ചു. എസ് പി ഉള്പ്പെടെ രണ്ടംഗ സംഘമാണ് ദുബായിലേയ്ക്ക് തിരിച്ചത്. ഫൈസല് ഫരീദിനെ ചോദ്യം ചെയ്യുന്നതിനൊപ്പം അറ്റാഷെയില് നിന്നും സംഘം വിവരങ്ങള് ശേഖരിക്കും.
തിരുവനന്തപുരം വിമാനത്താവളത്തിലെ യുഎഇ നയതന്ത്ര കോണ്സുലേറ്റ് വഴി സ്വര്ണ്ണം കടത്തിയ കേസിലെ മുഖ്യപ്രതിയാണ് ഫൈസല് ഫരീദ്. ഫൈസല് ഫരീദാണ് സ്വര്ണ്ണം അയച്ചതെന്ന നിര്ണ്ണായക മൊഴി സ്വപ്നസുരേഷും, സരിതും അന്വേഷണ സംഘത്തിന് നല്കിയിരുന്നു.
ഫൈസല് ഫരീദിനെ യുഎഇ അന്വേഷണ സംഘത്തിന് കൈമാറുമെന്നാണ് സൂചന. ഇതോടൊപ്പം തന്നെ യുഎഇ അറ്റാഷെയില് നിന്നും സംഘം വിവരങ്ങള് ശേഖരിക്കും. അറ്റാഷെയെ ചോദ്യം ചെയ്യാനുള്ള അനുമതി യുഎഇ സര്ക്കാരില് നിന്ന് തേടിയിരുന്നു. അന്വേഷണവുമായി സഹകരിക്കുമെന്ന് യുഎഇ ഇന്ത്യന് വിദേശകാര്യ മന്ത്രാലയത്തെ അറിയിച്ചിരുന്നു. അറ്റാഷെയെ ചോദ്യം ചെയ്യുന്നതുള്പ്പെടെയുള്ള നടപടികളില് വ്യക്തത വരുത്തിയ ശേഷമാണ് അന്വേഷണ സംഘം യാത്രതിരിച്ചത്.
