പാലക്കാട് : അട്ടപ്പാടിയില് യുവാവിനെ അടിച്ചുകൊന്ന കേസില് മുഴുവന് പ്രതികളും പിടിയിലായി. ഭൂതുവഴി സ്വദേശി കാര്ത്തിക്ക് (23) കൂടി പിടിയിലായതോടെ പ്രതികളെല്ലാവരും കസ്റ്റഡിയില് ആയതായി പോലീസ് അറിയിച്ചു. ദോണിഗുണ്ട് സ്വദേശി അഖില് (24), മേലെ കണ്ടിയൂര് സ്വദേശി ജോമോന് (22) താവളം സ്വദേശി അനന്തു (24) എന്നിവരെ രാവിലെ അറസ്റ്റ് ചെയ്തിരുന്നു. ആകെ പത്ത് പ്രതികളാണ് കേസിലുള്ളത്.
പണമിടപാടിനെ ചൊല്ലിയുള്ള തര്ക്കത്തിനിടെയാണ് കൊടുങ്ങല്ലൂര് സ്വദേശി നന്ദകിഷോറിനെ അടിച്ചു കൊന്നത്. തോക്ക് കച്ചവടുമായി ബന്ധപ്പെട്ട വാക്കുതര്ക്കമാണ്, മര്ദ്ദനത്തിലും കൊലയിലും കലാശിച്ചത്. കണ്ണൂരില് നിന്ന് കിളികളെ കൊല്ലുന്ന തോക്ക് എത്തിച്ച് നല്കാം എന്ന ഉറപ്പില് നന്ദകിഷോറും വിനായകനും പ്രതികളില് നിന്ന് ഒരുലക്ഷം രൂപ വാങ്ങിയിരുന്നു. എന്നാല് പറഞ്ഞ സമയത്തിനകം തോക്ക് എത്തിച്ചുകൊടുത്തില്ല.
പണം തിരികെ ചോദിച്ചപ്പോള് അത് നല്കിയിയതുമില്ല. ഇതാണ് തര്ക്കത്തിന് കാരണം. മര്ദ്ദനമേറ്റ നന്ദകിഷോറിനെയും വിനായകനെയും ആശുപത്രിയില് എത്തിച്ച് പ്രതികള് മുങ്ങുകയായിരുന്നു. എന്നാല് നന്ദകിഷോര് ആശുപത്രിയില് എത്തും മുന്പേ മരിച്ചതായി പോലീസ് അറിയിച്ചു. കണ്ണൂര് സ്വദേശിയായ വിനായകനെ പ്രതികള് നാല് ദിവസമായി കസ്റ്റഡിയില് വെച്ച് മര്ദ്ദിക്കുകയായിരുന്നു. ഇതുമൂലം വിനായകന്റെ ശരീരം മുഴുവന് ഗുരുതരമായി പരിക്കേറ്റിരുന്നു.
