തിരുവനന്തപുരം : എകെജി സെന്ററില് ഉണ്ടായത് നാനോ ഭീകരാക്രമണമാണോ എന്ന് പി.സി വിഷ്ണുനാഥ് എംഎല്എ.
കരിയില പോലും കത്താത്ത മൂന്ന് കല്ലുകളെ മാത്രം ലക്ഷ്യം വച്ചുള്ള ഭീകരാക്രമണമാണ് അതെന്ന് അദ്ദേഹം പരിഹസിക്കുകയും ചെയ്തു. എകെജി സെന്ററിന് നേരെ നടന്ന ആക്രമണത്തില് പ്രതിപക്ഷം നല്കിയ അടിയന്തര പ്രമേയത്തിന്മേലുള്ള ചര്ച്ചയില് പങ്കെടുത്ത് സംസാരിക്കുകയായിരുന്നു അദ്ദേഹം. ഇടിഞ്ഞു പൊളിഞ്ഞു വീഴുന്ന പോലുള്ള വലിയ ശബ്ദം കേട്ടെന്നാണ് ശ്രീമതി ടീച്ചര് പറഞ്ഞത്. ഇത്ര വലിയ ശബ്ദം ഉണ്ടായിട്ടും അടുത്തുണ്ടായിരുന്ന പോലീസുകാര് കേട്ടില്ലേ എന്നും വിഷ്ണുനാഥ് ചോദിച്ചു.
‘എകെജി സെന്റര് ആക്രമണം നടന്നശേഷം കോണ്ഗ്രസ് ഓഫീസുകള്ക്കുനേരെ പോലീസിന് മുന്നില് വച്ച് സി പി എം വ്യാപകമായ ആക്രമണം അഴിച്ചുവിടുകയാണ്. ആലപ്പുഴയില് എം എല് എയുടെ നേതൃത്വത്തില് കൊലവിളി മുദ്രാവാക്യം വിളിച്ച് പ്രകടനം നടത്തുമ്പോള് അതെല്ലാം ആസ്വദിച്ച് കൂടെനടക്കുകയായിരുന്നു പോലീസ്. പോലീസ് കാവലുള്ള എ കെ ജി സെന്റര് എങ്ങനെ ആക്രമിക്കപ്പെട്ടു, ആക്രമണം നടത്തിയ ആളെ എന്തുകൊണ്ട് പോലീസ് പിന്തുടര്ന്നില്ല, പോലീസിന്റെ നിരന്തര നിരീക്ഷണം ഉള്ളയിടത്ത് ആക്രമണം എങ്ങനെ നടന്നു വിഷ്ണുനാഥ് ചോദിച്ചു.
