തിരുവനന്തപുരം : കേരളത്തിലെ മൂന്ന് പ്രധാന ദേശീയപാതകളുടെ നിര്മാണത്തിന് വിശദപദ്ധതി റിപ്പോര്ട്ട് (ഡി.പി.ആര്.) തയ്യാറാക്കാന് ഏര്പ്പെട്ട കരാറുകള് ദേശീയപാത അതോറിറ്റി റദ്ദാക്കുന്നു. നിര്മാണ സാമഗ്രികളുടെ ജി.എസ്.ടി., കല്ലിന്റെയും മണ്ണിന്റെയും റോയല്റ്റി എന്നിവ ഒഴിവാക്കുന്നതുസംബന്ധിച്ച് സംസ്ഥാനത്തിന്റെ തീരുമാനം വൈകിക്കുന്നതാണ് കാരണം.
തിരുവനന്തപുരം ഔട്ടര് റിങ് റോഡ് (7000 കോടി), കൊല്ലം-ചെങ്കോട്ട (3500 കോടി), എറണാകുളം ബൈപ്പാസ് (1000 കോടിക്കുമുകളില്) എന്നീ മൂന്ന് പദ്ധതികളാണ് പ്രതിസന്ധിയിലായത്. നിലവിലെ കരാര് ഒഴിവാക്കി സംസ്ഥാന തീരുമാനം വരുന്നമുറയ്ക്ക് പുതിയ കരാര് നല്കാനാണ് അതോറിറ്റി ആലോചിക്കുന്നത്. ഇക്കാര്യം സംസ്ഥാന സര്ക്കാരിനെ അറിയിക്കുകയും ചെയ്തു.
