കോതമംഗലം : ബ്രൗണ്ഷുഗറുമായി അസം സ്വദേശി പിടിയില്. നാഗോവ് ജില്ലയില് ബത്തദര്ബാവ പൊലീസ് സ്റ്റേഷന് പരിധിയില് അബുല് ബാഷയെയാണ് (30) എക്സൈസ് സി.ഐ എ.ജോസ് പ്രതാപിന്റെ നേതൃത്വത്തില് പിടികൂടിയത്. നെല്ലിക്കുഴി ഇന്ദിര ഗാന്ധി കോളജ് പരിസരങ്ങളില് പരിശോധന നടത്തിവരവേ, നെല്ലിക്കുഴി കനാല്പാലം ഭാഗത്ത് സംശയാസ്പദമായി ബൈക്കില് കണ്ട ഇയാളെ തടഞ്ഞു നിര്ത്തി പരിശോധിച്ചപ്പോഴാണ് 42 ചെറിയ കുപ്പിയില് സൂക്ഷിച്ചിരുന്ന ആറ് ഗ്രാം ബ്രൗണ്ഷുഗര് കണ്ടെത്തിയത്.
കോതമംഗലത്തെ വിവിധ കോളജുകളുടെ പരിസരത്ത് ലഹരിമരുന്ന് ഉപയോഗവും വില്പനയും നടക്കുന്നുണ്ടെന്ന രഹസ്യവിവരം ലഭിച്ചതിനെത്തുടര്ന്ന്, കോതമംഗലം എക്സൈസ് ഷാഡോ ടീം ആഴ്ചകളായി രഹസ്യനിരീക്ഷണം നടത്തിവരുകയായിരുന്നു. പ്രിവന്റിവ് ഓഫീസര്മാരായ കെ.എ. നിയാസ്, ജയ് മാത്യൂസ്, സിവില് എക്സൈസ് ഓഫീസര്മാരായ കെ.സി എല്ദോ, വി.എല് ജിമ്മി, പി.എസ് സുനില്, ടി.കെ അനൂപ്, ബേസില് കെ തോമസ്, ഡ്രൈവര് ബിജു പോള് എന്നിവരടങ്ങുന്ന സംഘമാണ് പ്രതിയെ പിടികൂടിയത്. പ്രതിയെ കോടതിയില് ഹാജരാക്കി.
