ഡല്ഹി: എന്ഡിഎ ഭരിക്കുന്ന സംസ്ഥാനങ്ങളില് ഏക സിവില് കോഡ് നടപ്പിലാക്കാനുള്ള നീക്കത്തില് ഉടക്കിട്ട് ഘടകകക്ഷികള്. തീരുമാനത്തിനു മുന്പ് ചര്ച്ചകള് വേണമെന്ന് ഹിന്ദുസ്ഥാനി ആവാം മോര്ച്ചയും ചിരാഗ് പാസ്വാന്റെ എല്ജെപി രാം വിലാസ് പാര്ട്ടിയും വ്യക്തമാക്കി. ബീഹാറില് നീക്കം തടയുമെന്ന ജെഡിയുവിന്റെ പ്രസ്താവനയ്ക്ക് പിന്നാലെയാണ് മറ്റ് ഘടകകക്ഷികളും രംഗത്ത് എത്തിയത്. ആന്ധ്രയില് ടിഡിപിയും ആശങ്ക പ്രകടിപ്പിച്ച് രംഗത്തെത്തി. മുന്നണിയിലെ സഖ്യ കക്ഷികളെ വിശ്വാസത്തില് എടുത്ത് കൂടിയാലോചനകള് നടത്തണമെന്നാണ് ആവശ്യം ഉയരുന്നത്. എന്ഡിഎയില് ഭിന്നത എന്ന വാര്ത്തകളില് ബിജെപിക്ക് അതൃപ്തി ഉണ്ടെന്നാണ് റിപ്പോര്ട്ട്.
അതിനിടെ മഹാരാഷ്ട്രയില് നീക്കത്തെ സ്വാഗതം ചെയ്ത് ശിവസേന ഷിന്ഡെ വിഭാഗം രംഗത്തെത്തി. 2029 ന് മുന്പ് എന്ഡിഎ ഭരിക്കുന്ന എല്ലാ സംസ്ഥാനങ്ങളിലും ഏക സിവില് കോഡ് നടപ്പിലാക്കും എന്നായിരുന്നു അമിത് ഷായുടെ പ്രഖ്യാപനം. ഞങ്ങള് ചില സംസ്ഥാനങ്ങളില് ഏകീകൃത സിവില് കോഡ് നടപ്പിലാക്കി. ബിജെപി നേതൃത്വത്തിലുള്ള എന്ഡിഎ ഭരിക്കുന്ന 21 സംസ്ഥാനങ്ങളിലും 2029ന് മുന്പ് ഏകീകൃത സിവില് കോഡ് നടപ്പിലാക്കുമെന്ന് എനിക്ക് ഉറപ്പുണ്ട് – അദ്ദേഹം പറഞ്ഞു. വിവാഹം, വിവാഹമോചനം, അനന്തരാവകാശം തുടങ്ങിയ വ്യക്തി നിയമങ്ങളില് പൊതുവായ നിയമ സംവിധാനം കൊണ്ടുവരല് ലക്ഷ്യമെന്നും അദ്ദേഹം വ്യക്തമാക്കി.
