ചെന്നൈ: തമിഴ്നാട്ടില് നീറ്റ് കോച്ചിംഗ് സെന്ററില് പ്രവേശനം നിഷേധിച്ചതിനെത്തുടര്ന്ന് 18കാരി ട്രെയിനിന് മുമ്പില് ചാടി ജീവനൊടുക്കി. ആബതരണപുരം സ്വദേശി ഉതിര്ഭാരതിയുടെ മകള് നിഷയാണ് മരിച്ചത്. വണ്ടല്ലൂര് റെയില്വേ സ്റ്റേഷനില് വെച്ച് കഴിഞ്ഞ ദിവസം വൈകിട്ട് 5.10ന് ആയിരുന്നു സംഭവം. സ്റ്റേഷനില് എത്തിയ നിഷ അതിവേഗമെത്തിയ ട്രെയിനിന് മുന്നിലേക്ക് എടുത്ത് ചാടുകയായിരുന്നു. ലോക്കോ പൈലറ്റ് ട്രെയിന് നിര്ത്താന് ശ്രമിച്ചെങ്കിലും നിഷ ചക്രത്തിനടിയിലായി. നിഷ തല്ക്ഷണം മരിച്ചു.
നെയ്വേലിയിലെ ബൈജൂസിന്റെ കോച്ചിംഗ് ക്ലാസിന് പോകുകയാണെന്ന് വിദ്യാര്ഥിനി മാതാപിതാക്കളോട് പറഞ്ഞിരുന്നത്. പരീക്ഷയിലെ മാര്ക്കിന്റെ അടിസ്ഥാനത്തില് വിദ്യാര്ത്ഥികളെ വേര്തിരിക്കുന്ന സമീപനമാണ് ബൈജൂസ് കോച്ചിങ് സെന്ററിലേതെന്ന് നിഷയുടെ പിതാവ് ആരോപിച്ചു. ഇതില് മകള് അസ്വസ്ഥയായിരുന്നു. ‘എന്റെ മകള്ക്ക് 399 മാര്ക്ക് ലഭിച്ചിരുന്നു. പക്ഷേ നെയ്വേലി ഇന്ദിര നഗറിലെ ബൈജൂസ് കോച്ചിംഗ് സെന്ററില് 400 ന് മുകളില് മാര്ക്ക് ലഭിച്ച വിദ്യാര്ത്ഥികളെ എടുത്ത് പ്രത്യേകം പരിശീലിപ്പിക്കുകയായിരുന്നു. ഇതോടെ പെണ്കുട്ടി വിഷാദത്തിലേക്ക് വീഴുകയായിരുന്നുവെന്നും പിതാവ് ആരോപിച്ചു.
