കൊച്ചി : കേരള ഹൈക്കോടതി ജഡ്ജിമാരുടെ നിയമനം അംഗീകരിച്ച്‌ കേന്ദ്ര സര്‍ക്കാര്‍ വിജ്ഞാപനം പുറപ്പെടുവിച്ചു. ഹൈക്കോടതി അഭിഭാഷകരായ മുരളി പുരുഷോത്തമന്‍, എ.എ. സിയാദ് റഹ്മാന്‍, തിരുവനന്തപുരം പ്രിന്‍സിപ്പല്‍ ജില്ല ജഡ്ജി കരുണാകര ബാബു, എറണാകുളം പ്രിന്‍സിപ്പല്‍ ജഡ്ജി ഡോ. കൗസര്‍ എടപ്പകത്ത് എന്നിവരെയാണ് അഡീ. ജഡ്ജിമാരായി നിയമിച്ചത്. 2020 നവംബറിലാണ് ഹൈകക്കോടതി ജഡ്ജിമാരായി ഇവരെ നിയമിക്കാന്‍ സുപ്രീംകോടതി കൊളീജിയം ശിപാര്‍ശ ചെയ്തത്. ഇതോടെ കേരള ഹൈക്കോടതിയിലെ ജഡ്ജിമാരുടെ എണ്ണം 40 ആയി.
ആലുവ സ്വദേശിയായ മുരളി പുരുഷോത്തമന്‍ പരേതനായ പി.എന്‍. പുരുേഷാത്തമന്റെയും സരസ്വതിയുടെയും മകനാണ്. എറണാകുളം ലോ കോളജില്‍നിന്ന് നിയമ ബിരുദം നേടിയശേഷം സീനിയര്‍ അഭിഭാഷകന്‍ നന്ദകുമാര മേനോന്റെ ജൂനിയറായി പ്രാക്ടീസ് തുടങ്ങി. 2000ല്‍ സ്വതന്ത്ര അഭിഭാഷകനായി. കേന്ദ്ര, സംസ്ഥാന തെരഞ്ഞെടുപ്പ് കമീഷന്റെയടക്കം ഒട്ടേറെ സ്ഥാപനങ്ങളുടെ സ്റ്റാന്‍ഡിങ് കൌണ്‍സലാണ്. അഡ്വ. വി.എന്‍. അച്യുതക്കുറുപ്പിെന്‍റ മകളും അഭിഭാഷകയുമായ ലീനയാണ് ഭാര്യ. മകന്‍ ഗോകുല്‍ മുരളി യു.എസില്‍ ഫേസ്ബുക്ക് നെറ്റ്വര്‍ക്ക് എന്‍ജിനീയറാണ്.
കണ്ണൂര്‍ സിറ്റി സ്വദേശിയായ ഡോ. കൗസര്‍ എടപ്പകത്ത് കാലിക്കറ്റ് സര്‍വകലാശാലയില്‍നിന്ന് ഒന്നാം റാങ്കോടെ നിയമ ബിരുദവും എം.ജി സര്‍വകലാശാലയില്‍നിന്ന് നിയമത്തില്‍ ബിരുദാനന്തര ബിരുദവും നേടി. ന്യൂഡല്‍ഹിയിലെ ഇന്ത്യന്‍ ലോ ഇന്‍സ്റ്റിറ്റ്യൂട്ടില്‍നിന്ന് പിഎച്ച്‌.ഡി നേടി. 1991ല്‍ തലശ്ശേരിയിലും 2002ല്‍ ഹൈക്കോടതിയിലും അഭിഭാഷകനായി പ്രാക്ടീസ് ആരംഭിച്ചു.
2009ല്‍ കേരള ജുഡീഷ്യല്‍ സര്‍വിസില്‍ ജില്ല സെഷന്‍സ് ജഡ്ജിയായി നേരിട്ട് നിയമനം ലഭിച്ചു. തിരുവനന്തപുരത്തും കോഴിക്കോട്ടും അഡീ. ജില്ല ജഡ്ജിയായിരുന്നു. പി.കെ മഹമൂദി‍ന്റെയും എടപ്പകത്ത് റൗളയുടെയും മകനാണ്. ഭാര്യ: ഡോ. അമീറ അഹമ്മദ് ഇസ്മായില്‍ (റിനൈ മെഡിസിറ്റി, എറണാകുളം). മുഹമ്മദ് അസം, ആലിയ മിഷാല്‍, ഷിറീന്‍ കൗസര്‍, സെയ്ഫ് കൗസര്‍ എന്നിവരാണ് മക്കള്‍.
പരേതനായ അഡ്വ. എ.എ. അബ്ദുല്‍ റഹ്മാന്റെയും ലത്തീഫയുടെയും മകനാണ് തൃക്കാക്കര സ്വദേശി സിയാദ് റഹ്മാന്‍. 1996ല്‍ മംഗളൂരുവില്‍നിന്ന് നിയമബിരുദമെടുത്തശേഷം അഭിഭാഷകനായി. അഡ്വ. എം.വി. ഇബ്രാഹീംകുട്ടി, മുന്‍ അഡ്വക്കറ്റ് ജനറല്‍ െക.പി. ദണ്ഡപാണി, ജെയ്ജി ഇട്ടന്‍ തുടങ്ങിയ മുതിര്‍ന്ന അഭിഭാഷകരുടെ ജൂനിയറായി. പിന്നീട് ഷെറീഫ് അസോസിയേറ്റ്സിന്റെ ഭാഗമായി. നാഷനല്‍ ഇന്‍ഷുറന്‍സ് കമ്പിനിയുടേതടക്കം ഒട്ടേറെ ധനകാര്യ സ്ഥാപനങ്ങളുടെ സ്റ്റാന്‍ഡിങ് കോണ്‍സലാണ്. സിജിനയാണ് ഭാര്യ. ഫിസ, ദിയ എന്നിവരാണ് മക്കള്‍.
കൊട്ടാരക്കര തേവന്നൂര്‍ സ്വദേശിയായ കരുണാകര ബാബു (കെ.ബാബു) 1994ലാണ് അഭിഭാഷകനായി പ്രാക്ടീസ് ആരംഭിച്ചത്. 2009ല്‍ കേരള ജുഡീഷ്യല്‍ സര്‍വിസില്‍ പ്രവേശിച്ചു. പത്തനംതിട്ട, കോട്ടയം, തലശ്ശേരി എന്നിവിടങ്ങളില്‍ അഡീ. ജില്ല ജഡ്ജിയായും എറണാകുളത്ത് സി.ബി.ഐ കോടതി ജഡ്ജിയായും സേവനം അനുഷ്ഠിച്ചു.
സുപ്രീം കോടതിയില്‍ രജിസ്ട്രാര്‍ (ഓഫിസര്‍ ഓണ്‍ സ്പെഷല്‍ ഡ്യൂട്ടി), ഹൈക്കോടതി സബോര്‍ഡിനേറ്റ് ജുഡീഷ്യറി രജിസ്ട്രാര്‍ എന്നീ നിലകളില്‍ പ്രവര്‍ത്തിച്ചിട്ടുണ്ട്. ശബരിമല സ്പെഷല്‍ കമീഷണറായിരുന്നു. സുപ്രീംകോടതി നിയോഗിച്ച ശ്രീപദ്മനാഭസ്വാമി ക്ഷേത്രം അഡ്മിനിസ്ട്രേറ്റിവ് കമ്മിറ്റി ചെയര്‍മാനാണ്. ഭാര്യ: കെ. സന്ധ്യ. കേരള ലോ അക്കാദമി വിദ്യാര്‍ഥിനി വൃന്ദ ബാബു, ലയോള സ്കൂള്‍ വിദ്യാര്‍ഥിനി വരുണ്‍ ബാബു എന്നിവരാണ് മക്കള്‍.
