കൊച്ചി : മഞ്ചേരിയില് ചികിത്സ കിട്ടാതെ ഇരട്ടക്കുട്ടികള് മരിച്ച സംഭവത്തില് ക്രിമിനല് കേസ് രജിസ്റ്റര് ചെയ്ത് അന്വേഷണം നടത്തണമെന്നാവശ്യപ്പെട്ട് ഹൈക്കോടതിയില് ഹര്ജി. കോവിഡ് സര്ട്ടിഫിക്കറ്റ് ഇല്ലാതെ തന്നെ അടിയന്തര ഘട്ടങ്ങളില് രോഗികളെ പ്രവേശിപ്പിക്കാന് ആശുപത്രികള്ക്ക് നിര്ദേശം നല്കണമെന്നും ഹര്ജിയില് ആവശ്യപ്പെടുന്നു.
അഭിഭാഷകനായ ബാലു ഗോപാലകൃഷ്ണന് ആണ് ഹൈക്കോടതിയെ സമീപിച്ചത്. കിഴിശേരി സ്വദേശി എന്.സി.ഷെരീഫിന്റെ ഭാര്യ സഹ്ല തസ്നീമിന്റെ ഇരട്ടക്കുഞ്ഞുങ്ങളാണ് ഞായറാഴ്ച വൈകുന്നേരം പ്രസവത്തോടെ മരിച്ചത്. കഴിഞ്ഞദിവസം പുലര്ച്ചെ നാലിന് വയറുവേദനയെ തുടര്ന്ന് ആശുപത്രിയിലെത്തിയ മാധ്യമപ്രവര്ത്തകന് കൂടിയായ എന്.സി. ഷെരീഫാണ് അധികൃതരുടെ അനാസ്ഥമൂലം ഇരുപതുകാരിയായ ഭാര്യയുമായി മണിക്കൂറുകള് അലഞ്ഞ് കോഴിക്കോട് മെഡിക്കല് കോളജിലെത്തിയത്. സ്വകാര്യ ആശുപത്രി ഉള്പ്പെടെ മൂന്ന് ആശുപത്രികളെ സമീപിച്ചെങ്കിലും എവിടെയും ചികിത്സാസൗകര്യം ലഭ്യമായില്ല.
പ്രസവചികിത്സയ്ക്ക് കോവിഡ് പിസിആര് ഫലം തന്നെ വേണമെന്നും കോവിഡ് ആന്റിജന് പരിശോധനാഫലം അംഗീകരിക്കില്ലെന്നും സ്വകാര്യആശുപത്രി നിര്ബന്ധം പിടിച്ചതാണ് ഈ ദുരിതത്തിനു കാരണമായതെന്ന് ഷരീഫ് പറഞ്ഞു. പിന്നീട് പിസിആര് ടെസ്റ്റ് ലഭിക്കുമോയെന്ന് അന്വേഷിച്ചു ഇവര്ക്ക് അലയേണ്ടി വന്നു.
ഇരട്ടക്കുട്ടികളെയാണ് ഗര്ഭം ധരിച്ചിരിക്കുന്നതെന്നതും ആശങ്ക വര്ധിക്കാന് കാരണമായിരുന്നു. യുവതി നേരത്തെ കോവിഡ് പോസിറ്റീവ് ആയിരുന്നു. എന്നാല്, പിന്നീട് രോഗം ഭേദമാവുകയും ചെയ്തിരുന്നു. കോഴിക്കോട് ഓമശേരിയിലെ സ്വകാര്യ ആശുപത്രിയിലേക്ക് വിളിച്ചു ചോദിച്ചപ്പോള് വരാന് പറഞ്ഞെങ്കിലും പിന്നീട് പാതിവഴി എത്തിയപ്പോള് തിരിച്ചുവിളിച്ച് കോവിഡ് പിസിആര് ഫലം വേണമെന്നും ആന്റിജന് ടെസ്റ്റ് ഫലം പോരെന്നും ഇവര് നിര്ബന്ധം പിടിച്ചു.
പിന്നീട് മറ്റൊരു സ്വകാര്യ മെഡിക്കല് കോളജ് ആശുപത്രിയിലെത്തിച്ചെങ്കിലും പിസിആര് പരിശോധനാഫലം വരാന് സമയമെടുക്കുമെന്നു പറഞ്ഞതിനാല് വീണ്ടും ആന്റിജന് പരിശോധന നടത്തി. നെഗറ്റീവ് ആയിരുന്നു ഫലം.
തുടര്ന്ന് യുവതിയെ സ്കാന് ചെയ്തപ്പോള് ഗര്ഭസ്ഥ ശിശുക്കളുടെ ഹൃദയമിടിപ്പ് കുറവാണെന്നു കണ്ടതോടെ കോഴിക്കോട് മെഡിക്കല് കോളജിലേക്ക് റഫര് ചെയ്യുകയായിരുന്നു. ആറോടെയാണ് യുവതിയെ ഇവിടെ പ്രവേശിപ്പിക്കാനായത്.
