റാന്നി : റാന്നി മേഖലയുടെ വലിയ വികസനത്തിനും ഗതാഗത കുരുക്കിനും പരിഹാരമാകുന്ന റാന്നി പുതിയ പാലത്തിന്റെ നിര്മ്മാണം പുരോഗമിക്കുന്നു. 2016-2017 കിഫ്ബി ഫണ്ടില് നിന്നും 27 കോടി രൂപ ചെലവഴിച്ചാണ് നിര്മ്മാണ പ്രവര്ത്തനം നടത്തുന്നത്.
നിലവില് പാലത്തിനായുള്ള നദിയിലെ പൈലിംഗ് പണികള് പൂര്ത്തീകരിച്ചു. ആദ്യ സര്വേയില് 379 മീറ്റര് നീളമായിരുന്നു കണക്കാക്കിയിരുന്നതെങ്കിലും പുതിയ ഡിസൈനില് രണ്ട് സ്പാന് കുറച്ചത് പാലത്തിന്റെ നീളം 317 മീറ്ററായി കുറച്ചു. പാലത്തിന്റെ വീതി 12 മീറ്ററാണ്. തൂണുകളുടെ നിര്മാണം നടന്നു വരുന്നു. തൂണുകളെ ബന്ധിപ്പിക്കുന്ന ബീമുകളുടെയും സ്പാനുകളുടെയും നിര്മ്മാണം കാലാവസ്ഥ അനുകൂലമായാല് കാലതാമസമില്ലാതെ പൂര്ത്തിയാക്കുമെന്ന് അസിസ്റ്റഡ് എക്സിക്യുട്ടീവ് എന്ജിനീയര് ബിജി തോമസ് പറഞ്ഞു. പാലത്തിന്റെ സൂപ്പര് സ്ട്രക്ച്ചര് ആര്ച്ച് ഷെയിപ്പിലാണ് നിര്മിക്കുന്നത്. പാലത്തിന്റെ അപ്രോച്ച് റോഡിനായി സ്ഥലം ഏറ്റെടുക്കല് നടപടി റവന്യൂ വകുപ്പ് നടത്തി വരുന്നു. രാജു ഏബ്രഹാം എംഎല്എയുടെ ശ്രമഫലമായാണ് പുതിയ പാലത്തിന് നിര്മ്മാണാനുമതി സംസ്ഥാന സര്ക്കാര് നല്കിയത്.