കാസര്കോട് : കാസര്കോട് തലപ്പാടിമുതല് തിരുവനന്തപുരം കാരോടുവരെ 645 കിലോമീറ്റര് നീളത്തില് ദേശീയപാത 66-ന്റെ നിര്മാണം പൂര്ത്തിയാകുന്നതോടൊപ്പം 11 ഇടത്ത് പുതിയ ടോള് കേന്ദ്രങ്ങളും വരുന്നു. തിരുവനന്തപുരം, കൊല്ലം ജില്ലകളില് രണ്ടുവീതവും ആലപ്പുഴ, എറണാകുളം, തൃശ്ശൂര്, മലപ്പുറം, കോഴിക്കോട്, കണ്ണൂര്, കാസര്കോട് ജില്ലകളില് ഒരോ കേന്ദ്രങ്ങളുമാണ് ഉണ്ടാവുക.
2008-ലെ ‘ദേശീയപാതകളില് ചുങ്കം പിരിക്കാനുള്ള നിയമം’ അടിസ്ഥാനമാക്കിയാണ് ടോള് നിരക്കുകള് നിശ്ചയിക്കുക. ഇതുപ്രകാരം കാറില് ഒരു കിലോമീറ്റര് സഞ്ചരിക്കാന് 65 പൈസയാണ് നല്കേണ്ടത്. ചെറിയ ചരക്കുവാഹനങ്ങള്, മിനി ബസുകള് തുടങ്ങിയവയ്ക്ക് 1.05 രൂപയും ബസുകള്ക്കും ട്രക്കുകള്ക്കും 2.20 രൂപയും മള്ട്ടി ആക്സില് വാഹനങ്ങള്ക്ക് 3.45 രൂപയുമാണ് നിരക്കുകള്. ഇരുചക്ര, മുച്ചക്ര വാഹനങ്ങള്ക്ക് ചുങ്കം ബാധകമല്ലെന്നും അറിയിച്ചിട്ടുണ്ട്.
