തൃശ്ശൂര് : തയ്യൽ മെഷ്യന് തകരാർ വന്നതിനെത്തുടര്ന്ന് ഫയൽ ചെയ്ത ഹർജിയിൽ കൊച്ചി ഇടപ്പള്ളി മെഹേല മെഷ്യൻസ് ഇന്ത്യാ ലിമിറ്റഡിന്റെ മാനേജിങ്ങ് ഡയറക്ടർ 178750 രൂപയും പലിശയും നൽകുവാൻ തൃശൂർ ഉപഭോക്തൃ കോടതി വിധി. തൃശൂർ തളിക്കുളം ഇടശ്ശേരിയിലുള്ള ഡ്രീംസ് ഗാർമെന്റ് യൂണിറ്റ് ഉടമ സുജ.എം.എസ്. ഫയൽ ചെയ്ത ഹർജിയിലാണ് വിധി. സുജ 143750 രൂപ നല്കിയാണ് പുതിയ തയ്യൽ മെഷ്യൻ വാങ്ങിയതു്. എന്നാല് വാഗ്ദാനം ചെയ്തതു് പോലെ മെഷ്യൻ പ്രവര്ത്തിച്ചില്ല. നിരന്തരം നൂൽ പൊട്ടിപ്പോകുന്ന അവസ്ഥയും ഉണ്ടായി. സ്ഥാപന ഉടമയോട് പരാതിപ്പെടുമ്പോൾ ടെക്നീഷ്യനെ വിടുകയും പരിശോധന നടത്തി പണം വാങ്ങിപ്പോവുകയുമായിരുന്നു പതിവ് രീതി. തകരാർ പരിഹരിക്കപ്പെട്ടിരുന്നുമില്ല. ഇതിനെ തുടർന്ന് സുജ തൃശൂർ ഉപഭോക്തൃ കോടതിയില് ഹര്ജി ഫയല് ചെയ്യുകയായിരുന്നു.
കോടതി നിയോഗിച്ച വിദഗ്ദ കമ്മീഷണർ പരിശോധന നടത്തി മിഷ്യന്റെ തകരാറുകൾ കോടതിക്ക് റിപ്പോർട്ട് ചെയ്തു. തെളിവുകൾ പരിഗണിച്ച പ്രസിഡണ്ട് സി.ടി.സാബു, മെമ്പർമാരായ ശ്രീജ.എസ്., ആർ.റാം മോഹൻ എന്നിവരടങ്ങിയ തൃശൂർ ഉപഭോക്തൃ കോടതി എതിർകക്ഷിയുടെ പ്രവൃത്തി സേവനത്തിലെ വീഴ്ചയാണെന്ന് വിലയിരുത്തി പരാതിക്കാരിക്ക് മിഷ്യന്റെ വിലയായ 143750 രൂപയും ആയതിന് ഹർജി തീയ്യതി മുതൽ 6% പലിശയും നഷ്ടപരിഹാരമായി 25000 രൂപയും ചിലവിലേക്ക് 10000 രൂപയും നൽകുവാൻ വിധി പുറപ്പെടുവിക്കുകയായിരുന്നു. ഹർജിക്കാരിക്ക് വേണ്ടി അഡ്വ.ഏ.ഡി.ബെന്നി ഹാജരായി.
