തിരുവല്ല : ഭിന്നശേഷി വിഭാഗങ്ങൾക്ക് തദ്ദേശ സ്വയംഭരണ സ്ഥാപനങ്ങൾ മുതൽ പാർലമെന്റ് വരെയുള്ള ജനാധിപത്യ വേദികളിൽ അർഹമായ രാഷ്ട്രീയ പ്രാതിനിധ്യവും തിരഞ്ഞെടുപ്പ് സംവരണവും ഉറപ്പാക്കണമെന്ന് ആവശ്യപ്പെട്ട് ഇന്ത്യൻ യൂത്ത് കോൺഗ്രസ് രംഗത്ത്. ഈ വിഷയം ഉന്നയിച്ച് യൂത്ത് കോൺഗ്രസ് പത്തനംതിട്ട ജില്ലാ ജനറൽ സെക്രട്ടറി റിജോ വള്ളംകുളം രാഷ്ട്രപതി ദ്രൗപദി മുർമുവിന് നിവേദനം സമർപ്പിച്ചു. ഭിന്നശേഷിക്കാരുടെ അവകാശങ്ങളും സാമൂഹിക ഉൾച്ചേരലും ഉറപ്പാക്കുന്നതിനായി രാജ്യത്ത് വിവിധ നിയമപരമായ നടപടികൾ നിലവിലുണ്ടെങ്കിലും ജനപ്രതിനിധി സ്ഥാപനങ്ങളിലെ അവരുടെ പങ്കാളിത്തം ഇപ്പോഴും പരിമിതമാണെന്ന് നിവേദനത്തിൽ പറയുന്നു. ഭിന്നശേഷിക്കാർക്ക് പഞ്ചായത്തുകൾ, മുനിസിപ്പാലിറ്റികൾ, നിയമസഭകൾ, പാർലമെന്റ് തുടങ്ങിയ സ്ഥാപനങ്ങളിൽ യഥാർഥ പ്രാതിനിധ്യം ലഭിക്കേണ്ടത് ജനാധിപത്യത്തിന്റെ അടിസ്ഥാന തത്വമാണെന്നും യൂത്ത് കോൺഗ്രസ് ആവശ്യപ്പെടുന്നു
ഭിന്നശേഷിക്കാർക്കായി രാഷ്ട്രീയ പ്രാതിനിധ്യം ഉറപ്പാക്കുന്നതുമായി ബന്ധപ്പെട്ട ഭരണഘടനാ, നിയമ, നയപരിഷ്കാരങ്ങൾ ആരംഭിക്കുക, തിരഞ്ഞെടുപ്പ് സംവരണം നടപ്പിലാക്കുന്നതിനുള്ള സാധ്യതകൾ പരിശോധിക്കുക, രാഷ്ട്രീയ പാർട്ടികൾ ഭിന്നശേഷിക്കാർക്ക് കൂടുതൽ സ്ഥാനാർത്ഥിത്വ അവസരങ്ങൾ നൽകുക, രാഷ്ട്രീയ നേതൃത്വ പരിശീലന പരിപാടികൾ സംഘടിപ്പിക്കുക, തിരഞ്ഞെടുപ്പ്-രാഷ്ട്രീയ പ്രക്രിയകൾ പൂർണമായും ഭിന്നശേഷി സൗഹൃദമാക്കുക തുടങ്ങിയ ആവശ്യങ്ങളാണ് നിവേദനത്തിലൂടെ മുന്നോട്ടുവെച്ചിരിക്കുന്നത്.
