തിരുവനന്തപുരം : നെയ്യാറ്റിന്കര നഗരസഭാ യോഗത്തില് കയ്യാങ്കളി. നഗരസഭാ ചെയര്പേഴ്സണുമായുള്ള ഉന്തിലും തള്ളിലും നഗരസഭാ കൗണ്സില് ഹാളില് വീണ് പ്രതിപക്ഷ നേതാവ് ലളിതാ സോളമന്റെ തലപൊട്ടി. കൈയ്യാങ്കളിയ്ക്കിടെ കൈ തട്ടി ചെയര്പേഴ്സണ് ഡബ്ള്യു. ആര് ഹീബയുടെ ശസ്ത്രക്രിയ കഴിഞ്ഞ കണ്ണിന് പരിക്കേറ്റു. ഇരുവരെയും ആദ്യം നെയ്യാറ്റിന്കര ഗവ. ആശുപത്രിയിലും പിന്നീട് തിരുവനന്തപുരം മെഡിക്കല് കോളേജ് ആശുപത്രിയിലും പ്രവേശിപ്പിച്ചു.
അഴിമതി ആരോപിച്ച് നെയ്യാറ്റിന്കര നഗരസഭയ്ക്ക് മുന്നില് കഴിഞ്ഞ നാല് ദിവസമായി കോണ്ഗ്രസ് റിലേ സത്യാഗ്രഹം നടത്തി വരികയാണ്. ഇന്ന് ലേലമുള്പ്പെടെ ചില വിഷയങ്ങളുമായി ബന്ധപ്പെട്ട് നഗരസഭാ കൗണ്സില് വിളിച്ചു ചേര്ത്തിരുന്നു. കൗണ്സില് ആരംഭിച്ചപ്പോള് സത്യാഗ്രഹവുമായി ബന്ധപ്പെട്ട വിഷയങ്ങള് കൗണ്സിലില് ചര്ച്ച ചെയ്യണമെന്ന് പ്രതിപക്ഷ നേതാവ് ലളിതാ സോളമന് ആവശ്യപ്പെട്ടു. എന്നാല് അജണ്ടയിലില്ലാത്ത വിഷയങ്ങള് ചര്ച്ച ചെയ്യാന് കഴിയില്ലെന്ന് ചെയര് പേഴ്സണ് അറിയിച്ചതാണ് വാക്കേറ്റത്തിനും ഉന്തിനും തള്ളിനും ഇടയാക്കിയത്. സംഘര്ഷ സാദ്ധ്യത കണക്കിലെടുത്ത് സ്ഥലത്ത് ശക്തമായ പോലീസ് കാവല് ഏര്പ്പെടുത്തി.
