തേനി : ജില്ലയിലെ മാവോയിസ്റ്റ് പ്രവര്ത്തകരുടെ വീടുകളില് എന്ഐഎ മിന്നല് പരിശോധന നടത്തി. വയനാട്ടില് പോലീസ് ഏറ്റുമുട്ടലില് കൊല്ലപ്പെട്ട മാവോയിസ്റ്റ് വേല്മുരുകന്റെ പെരിയകുളത്തിന് സമീപമുള്ള അണ്ണാനഗറിലെ വീട്ടിലും മാവോയിസ്റ്റ് കാര്ത്തി (37)ക്കിന്റെ ഉത്തമ പാളയത്തെ വീട്ടിലുമാണ് പരിശോധന നടന്നത്.
കഴിഞ്ഞ ഒരു വര്ഷത്തിനിടെ വേല്മുരുകന്റെ വീട്ടില് പുറത്തുനിന്ന് ആരൊക്കെ വന്നു പോയത് എന്നതടക്കം ബന്ധുക്കളോട് ചോദിച്ച് മനസിലാക്കി. വീട്ടില് പരിശോധനയും നടത്തി. മാവോയിസ്റ്റ് കാര്ത്തികിന്റെ വീട്ടില് എത്തിയപ്പോള് ഈ സമയം ഇയാളുടെ ബന്ധുക്കള് മാത്രമെ വീട്ടിലുണ്ടായിരുന്നുള്ളു. മാസങ്ങളായി കാര്ത്തികിന് വീടുമായി ബന്ധമില്ലെന്നും എവിടെയാണെന്ന് അറിയില്ലെന്നും അവര് മൊഴി നല്കി.
തുടര്ന്ന് അധികൃതര് വീട്ടില് തിരച്ചില് നടത്തി. കാര്ത്തിക് മാവോയിസ്റ്റുകളുമായി സോഷ്യല് മീഡിയാ വഴി ബന്ധപ്പെട്ടിട്ടുണ്ടാകാമെന്ന സംശയത്തിലാണ് റെയ്ഡ് നടന്നതെന്ന് പറയപ്പെടുന്നു. വ്യാഴാഴ്ച രാവിലെ മുതല് ഉച്ചവരെ വീടുകളില് പരിശോധന നടത്തിയെങ്കിലും രേഖകളൊന്നും പിടിച്ചെടുത്തിട്ടില്ല.
