കോഴിക്കോട്: നിപ ലക്ഷണങ്ങളുമായി നിലവില് 7 പേര് ചികിത്സയിലുണ്ടെന്നെന്ന് അവലോകന യോഗത്തിന് ശേഷം മന്ത്രിമാരായ വീണാ ജോര്ജും മഹമ്മദ് റിയാസും അറിയിച്ചു. ഇന്ന് മൂന്ന് പേര് കൂടി ചികിത്സ തേടി. എല്ലാവരും കോഴിക്കോട്ടെ സ്വകാര്യ ആശുപത്രിയില് ചികിത്സയിലാണ്. മരിച്ച മരുതോങ്കര സ്വദേശിയുടെ സമ്പര്ക്കത്തിലുള്ള നാല് പേരും ആയഞ്ചേരി സ്വദേശിയുടെ സമ്പര്ക്കത്തിലുള്ള മൂന്ന് പേരുമാണ് നിലവില് ലക്ഷണങ്ങളോടെ ചികിത്സയിലുള്ളത്. ആകെ 168 പേരാണ് സമ്പര്ക്ക പട്ടികയിലുള്ളത്. ആദ്യ കേസില് 158 പേരുണ്ട്. ഇവരില് 127 പേര് ആരോഗ്യ പ്രവര്ത്തകരാണ്.
നിപ സ്ഥിരീകരിക്കുകയാണെങ്കില് സി സി ടി വി ദൃശ്യങ്ങള് നോക്കി സമ്പര്ക്ക പട്ടിക വിപുലീകരിക്കും. രണ്ടാമത്തെ കേസില് സമ്പര്ക്കത്തിലുള 10 പേരെ തിരിച്ചറിഞ്ഞു. ഫലം പോസിറ്റീവ് ആയാല് റൂട്ട് മാപ് പുറത്തിറക്കുമെന്നും മന്ത്രി വീണാ ജോര്ജ് അറിയിച്ചു. നാളെ കേന്ദ്ര സംഘം എത്തിയതിന് ശേഷം വവ്വാലുകളുടെ ആവാസ കേന്ദ്രത്തില് പരിശോധന നടത്തും. ആകെ മൂന്ന് വിദഗ്ധ സംഘങ്ങള് നാളെ എത്തുമെന്നും മന്ത്രി വ്യക്തമാക്കി.
