തിരുവനന്തപുരം : നിയമസഭയിലെ കയ്യാങ്കളി കേസില്‍ സുപ്രീംകോടതി വിധിയുടെ പശ്ചാത്തലത്തില്‍ മന്ത്രി ശിവന്‍കുട്ടിക്കെതിരെയുള്ള പ്രതിപക്ഷ പ്രതിഷേധം ഇന്നും തുടരും. ഇന്നലെ നിയമസഭയില്‍ വിഷയം അടിയന്തര പ്രമേയമായി അവതരിപ്പിച്ചിരുന്നു. ഇന്ന് മറ്റ് രീതിയില്‍ സഭയില്‍ പ്രശ്‌നം ഉയര്‍ത്താനാണ് തീരുമാനം. സഭയ്ക്ക് പുറത്തും പ്രതിഷേധങ്ങള്‍ ഉണ്ടാകും. എന്നാല്‍ ആരോഗ്യപ്രശ്‌നങ്ങള്‍ ഉള്ളതിനാല്‍ മന്ത്രി ശിവന്‍കുട്ടി ഇന്നും നിയമസഭയില്‍ എത്തില്ല.
അതേസമയം, വിവാദങ്ങള്‍ക്കിടെ സി.പി.എം സംസ്ഥാന സെക്രട്ടറിയേറ്റ് യോഗം ഇന്ന് ചേരും.ഐ.എന്‍.എലിലെ പോരും കരിവന്നൂര്‍ ബാങ്ക് തട്ടിപ്പും യോഗത്തില്‍ ചര്‍ച്ചയാകും. യോജിച്ച് പോകണമെന്ന നിര്‍ദ്ദേശം ഐ.എന്‍.എല്‍ അവഗണിച്ചതില്‍ സി.പി.എം നേതൃത്വത്തിന് അതൃപ്തിയുണ്ട്. ഇന്നലെ അബ്ദുള്‍ വഹാബ് വിഭാഗം എ.കെ.ജി സെന്ററില്‍ എത്തിയപ്പോഴും എല്‍.ഡി.എഫ് കണ്‍വീനര്‍ വിയോജിപ്പ് പ്രകടിപ്പിച്ചിരുന്നു. ഇന്നത്തെ സെക്രട്ടറിയേറ്റിന് ശേഷമാകും തുടര്‍ നടപടികള്‍. കരിവന്നൂര്‍ ബാങ്ക് തട്ടിപ്പിന്റെ പശ്ചാത്തലത്തില്‍ ചേര്‍ന്ന തൃശൂര്‍ ജില്ലാ കമ്മിറ്റിയുടെ വിശദാംശങ്ങളും തുടര്‍നടപടികളും യോഗത്തില്‍ ചര്‍ച്ചയാകും.
