പത്തനംതിട്ട : കേന്ദ്ര സർക്കാരിന്റെ തൊഴിലാളി വിരുദ്ധ നയങ്ങൾക്കെതിരെ എൻസിപിയുടെ തൊഴിലാളി സംഘടനയായ നാഷണലിസ്റ്റ് ലേബർ കോൺഗ്രസിന്റെ (N L C )നേതൃത്വത്തില് പത്തനംതിട്ട ബിഎസ്എൻഎൽ ഓഫീസിന് മുന്നിൽ നടത്തിയ ധർണ്ണ സംസ്ഥാന സെക്രട്ടറി പത്മഗിരീഷ് ഉദ്ഘാടനം ചെയ്തു. കേരളമൊട്ടാകെ 101 കേന്ദ്ര സർക്കാർ സ്ഥാപനങ്ങൾ ഉപരോധിച്ചുകൊണ്ടുള്ള സമരത്തിന്റെ ഭാഗമായാണ് പത്തനംതിട്ടയിലും ധര്ണ്ണ നടത്തിയത്.
കോവിഡ് മഹാമാരി ലോകത്തെയാകെ വേട്ടയാടുന്ന സമയം മുതലെടുത്തുകൊണ്ട് കേന്ദ്രസർക്കാർ ഇന്ത്യയിലെ പൊതുമേഖലാ സ്ഥാപനങ്ങളും പ്രതിരോധ മേഖലയും സ്വകാര്യവൽക്കരിക്കാൻ നടത്തുന്ന നീക്കം പ്രതിഷേധാര്ഹമാണ്. ഇത്തരം നടപടികള് അവസാനിപ്പിക്കുവാന് സര്ക്കാര് തയ്യാറാകണം. തൊഴിലാളികളുടെ ജോലിസമയം എട്ടു മണിക്കൂറിൽ നിന്നും 12 മണിക്കൂർ ആക്കിയ നടപടി ഒരിക്കലും അംഗീകരിക്കാൻ കഴിയുന്നതല്ല. ഇതിനെതിരെ ശക്തമായ പ്രതിഷേധ സമരങ്ങളുമായി നാഷണലിസ്റ്റ് ലേബർ കോൺഗ്രസ് രംഗത്തിറങ്ങുമെന്ന് പത്മഗിരീഷ് പറഞ്ഞു. എൻസിപി ജില്ലാ സെക്രട്ടറി റിജിൻ കരമുണ്ടക്കൽ അധ്യക്ഷത വഹിച്ചു. ജില്ലാ വൈസ് പ്രസിഡണ്ട് അനീഷ് ജോസഫ്, ലിജു കാക്കനാട്, രഞ്ജിത്ത് എന്നിവർ പ്രസംഗിച്ചു.