തിരുവനന്തപുരം: സംസ്ഥാനത്ത് പാമ്പുകടിയേറ്റുള്ള മരണങ്ങൾ പൂർണ്ണമായും ഒഴിവാക്കുന്നതിനായി ആരോഗ്യവകുപ്പ് ശക്തമായ നടപടികൾ സ്വീകരിക്കുമെന്ന് മന്ത്രി കെ. മുരളീധരൻ. പൊതുജനാരോഗ്യ രംഗത്ത് രാജ്യം കേരളത്തെ മാതൃകയാക്കുമ്പോഴും പാമ്പുകടിയും പേവിഷബാധയും മൂലമുള്ള മരണങ്ങൾ ഇപ്പോഴും തുടരുന്നത് ദുഃഖകരമാണെന്ന് അദ്ദേഹം പറഞ്ഞു. കേരള ആരോഗ്യ ശാസ്ത്ര സർവകലാശാലയുടെ സ്കൂൾ ഓഫ് പബ്ലിക് ഹെൽത്തിന്റെ ആഭിമുഖ്യത്തിൽ ‘സ്നേക്ക് ബൈറ്റ് എൻവെനമിംഗ് മാനേജ്മെന്റ്’ എന്ന വിഷയത്തിൽ സംഘടിപ്പിച്ച ദേശീയ സെമിനാർ ഉദ്ഘാടനം ചെയ്യുകയായിരുന്നു മന്ത്രി.
പ്രതിവർഷം ഏകദേശം ഇരുപതോളം പേരാണ് സംസ്ഥാനത്ത് പാമ്പുകടിയേറ്റ് മരണപ്പെടുന്നത്. ഒരു ജീവൻ പോലും നഷ്ടപ്പെടാൻ പാടില്ലെന്നതാണ് സർക്കാരിന്റെ നയമെന്നും, മരണപ്പെടുന്നവരിൽ ഭൂരിഭാഗവും കുട്ടികളാണെന്നത് വിഷയത്തിന്റെ ഗൗരവം വർദ്ധിപ്പിക്കുന്നുവെന്നും അദ്ദേഹം ചൂണ്ടിക്കാട്ടി. പാമ്പുകടിയേൽക്കുന്നവർക്ക് പാർശ്വഫലങ്ങൾ ഭയന്ന് ചികിത്സ നൽകാൻ ഡോക്ടർമാർ മടിക്കരുതെന്നും, ഇതിനായുള്ള സംവിധാനങ്ങൾ പ്രാഥമികാരോഗ്യ കേന്ദ്രങ്ങൾ മുതൽ സജ്ജമാക്കുമെന്നും മന്ത്രി ഉറപ്പുനൽകി. ആശുപത്രികളിലെ ഡോക്ടർമാരുടെയും നഴ്സുമാരുടെയും സേവനങ്ങളെ അദ്ദേഹം പ്രശംസിക്കുകയും ചെയ്തു.
ആരോഗ്യ സർവകലാശാല വൈസ് ചാൻസലർ ഡോ. മോഹനൻ കുന്നുമ്മൽ അധ്യക്ഷത വഹിച്ച ചടങ്ങിൽ, പാമ്പുകടി നിരക്ക് പൂജ്യത്തിലെത്തിക്കുന്നതിനുള്ള വൈദ്യശാസ്ത്ര ഗവേഷണങ്ങൾക്ക് സർവകലാശാല പൂർണ്ണ പിന്തുണ നൽകുമെന്ന് അദ്ദേഹം വ്യക്തമാക്കി. സെമിനാറിൽ ആരോഗ്യ മേഖലയിലെ പ്രമുഖർ പങ്കെടുത്തു. ഐ.സി.എം.ആർ മുൻ എമിരിറ്റസ് പ്രൊഫസർ ഡോ. നിഷിഗന്ധ നായിക്, ഡോ. സന്ദീപ് ദാസ്, ഡോ. കാർത്തിക് സുനഗർ തുടങ്ങിയവർ വിവിധ പ്രബന്ധങ്ങൾ അവതരിപ്പിച്ചു. ഡി.എം.ഒ ഡോ. ബിന്ദു മോഹൻ, മെഡിക്കൽ കോളേജ് പ്രിൻസിപ്പൽ ഡോ. പി.കെ. ജബ്ബാർ തുടങ്ങിയവർ സംബന്ധിച്ചു.
