നോയിഡ : യുപിയിലെ നോയിഡയില്‍ വാഹനങ്ങള്‍ തമ്മില്‍ ഉരസിയതിനെച്ചൊല്ലി തര്‍ക്കം ഉണ്ടായതിന് പിന്നാലെ കാര്‍ ഇടിപ്പിച്ച്‌ വിദ്യാര്‍ത്ഥിയെ കൊലപ്പെടുത്തി.ഇരു വിഭാഗങ്ങള്‍ സഞ്ചരിച്ച കാറുകള്‍ തമ്മില്‍ ഉരസിയതിനെച്ചൊല്ലി ഉണ്ടായ തര്‍ക്കമാണ് കൊലപാതകത്തില്‍ കലാശിച്ചത്. യുപിയിലെ ഗാല്‍ ഗോട്ടിയാസ് യൂണിവേഴ്‌സിറ്റിയിലെ വിദ്യാര്‍ത്ഥികളാണ് ആക്രമണത്തിന് ഇരയായത്. ഇന്നലെ അര്‍ധരാത്രി നോയിഡ ബീറ്റ 2 പൊലീസ് സ്റ്റേഷന്‍ പരിധിയില്‍ വച്ചായിരുന്നു സംഭവം. സുഹൃത്തുക്കളായ 5 വിദ്യാര്‍ത്ഥികള്‍ താമസ സ്ഥലത്തേയ്ക്ക് കാറില്‍ മടങ്ങവേയാണ് അപകടം ഉണ്ടായത്.
വിദ്യാര്‍ത്ഥികള്‍ സഞ്ചരിച്ചിരുന്ന കാര്‍ മറ്റൊരു കാറുമായി ഉരസിയതിനെ ചൊല്ലി തര്‍ക്കമുണ്ടായി. ഇതേതുടര്‍ന്ന് രണ്ടാമത്തെ കാറില്‍ എത്തിയ സംഘം അമിത വേഗത്തില്‍ വിദ്യാര്‍ത്ഥികള്‍ക്കു മേല്‍ ഇടിച്ചു കയറുകയായിരുന്നു. ഇരുപത്തിമൂന്നുകാരന്‍ ആയുഷ് സംഭവ സ്ഥലത്ത് തന്നെ കൊല്ലപ്പെട്ടു. കൂടെ ഉണ്ടായിരുന്ന നാല് സുഹൃത്തുക്കള്‍ ഗുരുതര പരുക്കുകളോടെ ആശുപത്രിയിലാണ്. സുഹൃത്തുക്കളായ അഞ്ച് വിദ്യാര്‍ത്ഥികളും ഒരുമിച്ച്‌ വാടകയ്ക്കാണ് താമസിച്ചിരുന്നത്. ഇവരുടെ കുടുംബത്തെ വിവരം അറിയിച്ചിട്ടുണ്ടെന്നും കാര്‍ ഓടിച്ചയാളെ കണ്ടെത്തുന്നതിനുള്ള അന്വേഷണം തുടരുകയാണെന്നും പോലീസ് പറഞ്ഞു. കൃത്യത്തിന് ഉപയോഗിച്ച കാര്‍ പോലീസ് പിടികൂടിയിരുന്നു. അന്വേഷണം തുടരുകയാണ്.
