ഇറാന് : യുഎസും ഇറാനുമിടയിലെ സംഘര്ഷ സാഹചര്യം മുറുകുകയും ഇസ്ലാമാബാദില് നടക്കേണ്ടിയിരുന്ന രണ്ടാംവട്ട സമാധാന ചര്ച്ചകള് അനിശ്ചിതത്വത്തിലാവുകയും ചെയ്തതോടെ അസംസ്കൃത എണ്ണവിലയില് വന് കുതിപ്പുണ്ടായി. യുഎസ് ഡോളറും മുന്നേറ്റമുണ്ടാക്കി. ബ്രെന്റ് ക്രൂഡ് 5.71 ശതമാനം വര്ധിച്ച് 95.54 ഡോളറായി. ഡബ്ല്യുടിഐ ക്രൂഡ് 6.38 ശതമാനം വര്ധിച്ച് 89.20 ഡോളറുമായി. സംഘര്ഷ സാഹചര്യം തുടരുകയാണെങ്കില് വില ഇനിയും വര്ധിക്കാനാണ് സാധ്യത. പശ്ചിമേഷ്യയിലെ യുദ്ധത്തിന്റെ തുടക്കത്തില് ബാരലിന് 65 ഡോളറായിരുന്ന എണ്ണവില യുദ്ധം രൂക്ഷമായ സമയത്ത് 115 ഡോളര് വരെ ഉയര്ന്നിരുന്നു.
പിന്നീട് ഇറാനും യുഎസും വെടിനിര്ത്തലിലെത്തുകയും ഹോര്മുസ് തുറക്കുകയും ചെയ്തതോടെയാണ് വിലയിടിഞ്ഞത്. എന്നാല്, ഹോര്മുസില് നാവിക ഉപരോധം തുടരാനുള്ള ട്രംപിന്റെ തീരുമാനം സമാധാന ശ്രമങ്ങള്ക്ക് തിരിച്ചടിയായി. പിന്നാലെ ഇറാന് ഹോര്മുസ് അടക്കുകയും ചെയ്തു. ഇന്നലെ യുഎസ് ഇറാന് കപ്പല് പിടിച്ചെടുക്കുക കൂടി ചെയ്തതോടെ സംഘര്ഷാവസ്ഥ വര്ധിക്കുകയും എണ്ണവില ഉയരുകയുമായിരുന്നു.
