കൊച്ചി : ഒളിമ്പ്യന്‍ മയൂഖ ജോണിക്ക് വധഭീഷണി. മയൂഖയെയും കുടുംബത്തെയും വധിക്കുമെന്ന് കത്തിലൂടെയാണ് ഭീഷണിപ്പെടുത്തിയത്. കത്തിന്റെ ഉറവിടം വ്യക്തമല്ല. വധഭീഷണിയുടെ പശ്ചാത്തലത്തില്‍ മയൂഖ ഡിജിപിക്ക് പരാതി നല്‍കി.
കത്തില്‍ സ്ത്രീത്വത്തെ അപമാനിക്കുന്ന രീതിയില്‍ വളരെ മോശം പരാമര്‍ശങ്ങളുമുണ്ട്. നേരത്തേ മയൂഖ തന്റെ സുഹൃത്തിന് നേരിടേണ്ടി വന്ന പീഡനത്തെക്കുറിച്ച്‌ തുറന്ന് പറഞ്ഞിരുന്നു. പോലീസില്‍ നിന്ന് നീതി കിട്ടിയില്ലെന്നും പത്രസമ്മേളനത്തില്‍ മയൂഖ വെളിപ്പെടുത്തിയിരുന്നു. ഇതിനു പിന്നാലെയാണ് വധഭീഷണി ഉണ്ടായിരിക്കുന്നത്. പ്രതിക്ക് വേണ്ടി മന്ത്രിതലത്തില്‍ വരെ ഇടപെടലുണ്ടായതായും വനിതാ കമ്മീഷന്‍ മുന്‍ അധ്യക്ഷ ജോസഫൈന്‍ ഇരയ്ക്കൊപ്പം നിന്നില്ലെന്നും മയൂഖ കുറ്റപ്പെടുത്തിയിരുന്നു.
