ശബരിമല:ഓണനാളുകളിലെ പൂജകള്ക്കായി ശബരിമല ശ്രീധര്മ്മശാസ്ത ക്ഷേത്രനട ചൊവ്വാഴ്ച വൈകീട്ട് അഞ്ചിന് തുറക്കും. സെപ്റ്റംബര് 10 വരെ ക്ഷേത്രനട തുറന്നിരിക്കും. ഉത്രാട ദിനം മുതല് ചതയ ദിനം വരെ ഭക്തര്ക്കായി ഓണസദ്യയും ഒരുക്കിയിട്ടുണ്ട്. നട തുറക്കുന്ന അഞ്ച് ദിവസങ്ങളിലും ഉദയാസ്തമയപൂജ, അഷ്ടാഭിഷേകം, കലശാഭിഷേകം, കളഭാഭിഷേകം, പടിപൂജ, പുഷ്പാഭിഷേകം എന്നിവ ഉണ്ടാകും. 10ന് രാത്രി 10ന് ഹരിവരാസനം പാടി തിരുനട അടക്കും. ദര്ശനത്തിനായി ഭക്തര് വെര്ച്വല് ക്യൂ സംവിധാനം ഉപയോഗിക്കണം. നിലക്കലില് ഭക്തര്ക്കായി സ്പോട്ട് ബുക്കിങ് കൗണ്ടറുകളും സജ്ജീകരിച്ചിട്ടുണ്ട്.
