പത്തനംതിട്ട : ഓണത്തോട് അനുബന്ധിച്ച് കെഎസ്ആർടിസി അന്തർ സംസ്ഥാന സ്പെഷ്യൽ സർവ്വീസുകൾ ആരംഭിക്കുന്നു. ഗതാഗത മന്ത്രി എ.കെ. ശശീന്ദ്രനാണ് ഇക്കാര്യം അറിയിച്ചത്. മൈസൂരു, ബെംഗളൂരു എന്നിവിടങ്ങളിലേയ്ക്കും തിരിച്ചും ഈ മാസം 27 മുതൽ കെഎസ്ആർടിസി സ്പെഷ്യൽ സർവ്വീസ് നടത്തുമെന്ന് മന്ത്രി അറിയിച്ചു. കോഴിക്കോട്, പാലക്കാട്, എറണാകുളം, തിരുവനന്തപുരം എന്നീ ജില്ലകളിൽ നിന്നാണ് സർവ്വീസ്.
പത്ത് ശതമാനം അധിക നിരക്കിലായിരിക്കും സ്പെഷ്യൽ സർവ്വീസ് നടത്തുക. ടിക്കറ്റ് ഓണ്‍ലൈൻ ആയി രജിസ്റ്റർ ചെയ്യാമെന്നും യാത്രക്കാർ എല്ലാവരും കോവിഡ് ജാഗ്രതാ പോർട്ടലിൽ രജിസ്റ്റർ ചെയ്ത് കേരളത്തിലേക്കുള്ള പാസ് എടുക്കണമെന്നും മന്ത്രി അറിയിച്ചു. സർവ്വീസ് റദ്ദാക്കിയാൽ ടിക്കറ്റ് തുക തിരിച്ച് നൽകുമെന്നും മന്ത്രി കൂട്ടിച്ചേർത്തു
