റാന്നി: സംസ്ഥാന പാതയില് നടന്ന വാഹനാപകടത്തിൽ ഒരാള് മരിച്ചു. രണ്ടു പേര്ക്ക് പരിക്കേറ്റു. തിരുവനന്തപുരം കുന്നത്തുകാല് എല്ലുവിള സ്വദേശി അനുഗ്രഹയില് ബെന്നറ്റ് രാജ് (22) ആണ് മരിച്ചത്. നെടുമങ്ങാട് പ്ലാത്തറ രജീഷ് (കിച്ചു-32), അടൂര് സ്വദേശി ഡോണി(24) എന്നിവര്ക്കാണ് പരിക്കേറ്റത്. ഇവരെ റാന്നി താലൂക്ക് ആശുപത്രിയില് പ്രഥമശുശ്രൂഷ നല്കിയ ശേഷം വിദഗ്ധ ചികിത്സക്കായി കോഴഞ്ചേരിയിലെ സ്വകാര്യ ആശുപത്രിയിലേക്ക് മാറ്റി. അപകടം ഉണ്ടാക്കിയ കാറിന്റെ ഡ്രൈവര് ഡിക്സനെ പിന്നീട് നെഞ്ചുവേദനയെ തുടര്ന്ന് റാന്നിയിലെ സ്വകാര്യ ആശുപത്രിയില് പ്രവേശിപ്പിച്ചു. പുനലൂര്-മൂവാറ്റുപുഴ സംസ്ഥാന പാതയിലെ മന്ദിരം പൊട്ടങ്കല്പടിയില് ടേക്ക് എ.ബ്രേക്കിന് സമീപം ഇന്ന് ഉച്ചകഴിഞ്ഞ് മൂന്നരയോടെയാണ് അപകടം.
റാന്നി ഭാഗത്തു നിന്നും എത്തിയ ആള്ട്ടോ കാറും പത്തനംതിട്ട ഭാഗത്തു നിന്നും എത്തിയ ഫോര്ച്ച്യൂണര് കാറുമാണ് കൂട്ടിയിടിച്ചത്. അമിതവേഗതയില് ദിശതെറ്റിയാണ് ഫോര്ച്ച്യൂണര് കാറെത്തിയതെന്ന് ദൃക്സാക്ഷികള് പറഞ്ഞു. ശബരിമല പമ്പയില് ആഗോള അയ്യപ്പസംഗമത്തില് നടന്ന സംഗീത പരിപാടിക്കെത്തിയതാണ് അപകടത്തില്പെട്ടവര്. ഇവര് സംഗീതജ്ഞന് സ്റ്റീഫന് ദേവസിയുടെ ട്രൂപ്പിലെ കലാകാരന്മാരാണ്. പമ്പയിലെ പരിപാടിക്ക് ശേഷം ചെല്ലയ്ക്കാട് ഉള്ള സുഹൃത്തിനെ വീട്ടിലെത്തി മടങ്ങവെയാണ് അപകടത്തില് പെട്ടത്. മരിച്ച ബെന്നറ്റ് ഗിറ്റാറിസ്റ്റും രജീഷും ഡോണിയും ഡ്രം കൈക്കാര്യം ചെയ്യുന്നവരുമാണ്.
