തിരുവനന്തപുരം: ഡല്ഹിയിലെ കേരളത്തിന്റെ പ്രത്യേക പ്രതിനിധി മുന് കേന്ദ്ര മന്ത്രി കെ.വി.തോമസിന് ഓണറേറിയം അനുവദിച്ചു. ശമ്പളത്തിനും അലവന്സുകള്ക്കും പകരം പ്രതിമാസം ഒരു ലക്ഷം രൂപ ഓണറേറിയം അനുവദിക്കാന് ഇന്ന് ചേര്ന്ന മന്ത്രിസഭായോഗത്തിലാണ് തീരുമാനം. രണ്ട് അസിസ്റ്റന്റുമാര്, ഒരു ഓഫീസ് അറ്റന്ഡന്റ്, ഒരു ഡ്രൈവര് എന്നിവരെ നിയമിക്കാനും അനുമതി നല്കി. കെ.വി തോമസ് തനിക്ക് ശമ്പളം വേണ്ടെന്നും പകരം ഓണറേറിയം അനുവദിച്ചാല് മതിയെന്നും കാണിച്ച് സര്ക്കാരിന് കത്ത് നല്കിയിരുന്നു.
ജനുവരി 18ലെ മന്ത്രിസഭായോഗമാണു കെ.വി.തോമസിനെ ഡല്ഹിയിലെ പ്രത്യേക പ്രതിനിധിയായി നിയമിച്ചത്. ശമ്പളം വേണ്ടെന്നും ഓണറേറിയം മതിയെന്നും ആവശ്യപ്പെട്ട് കെ.വി.തോമസ് സര്ക്കാരിനു കത്ത് നല്കിയിരുന്നു. കോണ്ഗ്രസ് വിലക്കു ലംഘിച്ച് കണ്ണൂരില് സിപിഎം പാര്ട്ടി കോണ്ഗ്രസ് സെമിനാറില് പങ്കെടുത്തതോടെയാണു കെ.വി.തോമസ് പാര്ട്ടിയുമായി അകലുന്നത്. തൃക്കാക്കര ഉപതിരഞ്ഞെടുപ്പില് എല്ഡിഎഫ് കണ്വെന്ഷനില് പങ്കെടുത്തതോടെ തോമസിന്റെ നീക്കം മനസിലാക്കിയാണ് കോണ്ഗ്രസ് അദ്ദേഹത്തെ പുറത്താക്കിയത്.
