ആലപ്പുഴ : സ്കൂൾ തുറക്കാൻ ഇനി രണ്ടാഴ്ച മാത്രം. പുത്തൻ ട്രെൻഡുകളുമായി സ്കൂൾ വിപണി സജീവം. സ്പൈഡർമാൻ, ബിടിഎസ്, യുണികോൺ, ബാർബി, ഡോറ, ബെൻ ടെൻ, പോക്കിമോൻ, അവഞ്ചേഴ്സ് വിപണി കീഴടക്കിയിരിക്കുന്ന ബാഗുകളിലെ താരങ്ങൾ ഇവരാണ്. മുൻ വർഷങ്ങളിലെപ്പോലെ കാർട്ടൂൺ കഥാപാത്രങ്ങളും സൂപ്പർ ഹീറോകളും തന്നെയാണ് ഇക്കുറിയും ബാഗുകളിലും കുടകളിലും ഇടം പിടിച്ചിരിക്കുന്നത്. സ്കൂൾ വിപണിയിൽ പല ഇനങ്ങൾക്കും കഴിഞ്ഞവർഷത്തെ അപേക്ഷിച്ച് 10-20 ശതമാനം വരെ വിലവർധനയുണ്ട്.
ബാഗ് ബ്രാൻഡ് അനുസരിച്ച് ശരാശരി 500 രൂപമുതൽ 2,500 രൂപവരെയാണ് വില. കുറഞ്ഞ ബാഗുകൾ 350 രൂപമുതൽ ലഭ്യമാണ്. ലഞ്ച് ബോക്സുകൾ 300 രൂപമുതൽ ലഭ്യമാണ്. സ്റ്റീൽ വാട്ടർ ബോട്ടിലുകൾക്ക് 300 രൂപയിൽ വില തുടങ്ങുന്നു. 30 രൂപമുതൽ 300 രൂപവരെയാണ് പെൻസിൽ ബോക്സുകളുടെ വില. ഇൻസ്ട്രുമെന്റ് ബോക്സിന് 75- 250 രൂപ. 25 രൂപ മുതലുള്ള പൗച്ചുകളും വിൽപ്പനയ്ക്കുണ്ട്. നെയിം സ്ലിപ്പുകൾ 10 രൂപമുതൽ ലഭ്യമാണ്. ക്രിക്കറ്റ്-ഫുട്ബോൾ താരങ്ങൾ, പൂമ്പാറ്റ, കാറുകൾ തുടങ്ങി കുട്ടികളെ ആകർഷിക്കുന്ന ചിത്രങ്ങളുള്ള നെയിം സ്ലിപ്പുകൾ കടകളിലുണ്ട്. നോട്ട്ബുക്കുകൾക്ക് 20 മുതൽ 180 രൂപവരെയാണ് വില.
