കോട്ടയം: നേമം അഭ്യൂഹങ്ങള്‍ അവസാനിച്ചതോടെ പുതുപ്പള്ളിയില്‍ ഉമ്മന്‍ ചാണ്ടി നാമനിര്‍ദ്ദേശപത്രിക സമര്‍പ്പിക്കും. ചൊവ്വാഴ്ച പ്രവര്‍ത്തകര്‍ക്കും നേതാക്കള്‍ക്കും ഒപ്പം രാവിലെ 11ന് പത്രിക സമര്‍പ്പിക്കാനാണ് തീരുമാനം. അസിസ്റ്റന്റ് റിട്ടേണിംഗ് ഓഫീസറായ പാമ്പാടി ബിഡിഒയ്ക്ക് മുമ്പാകെയാകും പത്രിക സമര്‍പ്പിക്കുക.
അതേസമയം ഉമ്മന്‍ ചാണ്ടി തലസ്ഥാനത്താണെങ്കിലും പുതുപ്പള്ളിയില്‍ പ്രാദേശിക നേതാക്കളുടെ നേതൃത്വത്തില്‍ പ്രവര്‍ത്തകര്‍ പ്രചരണം തുടങ്ങി. ഇന്ന് മുതല്‍ മണ്ഡലത്തിന്റെ വിവിധ മേഖലകളില്‍ ഭവനസന്ദര്‍ശനം ഉള്‍പ്പടെ തുടങ്ങിയാണ് പ്രചരണം പുരോഗമിക്കുന്നത്. പത്രിക സമര്‍പ്പിക്കുന്ന ചൊവ്വാഴ്ച വൈകുന്നേരം അഞ്ചിന് പാമ്പാടിയില്‍ വെച്ച്‌ മണ്ഡലം കണ്‍വെന്‍ഷനും നടക്കും. പാമ്പാടി സെന്റ് ജോണ്‍സ് പള്ളി പാരിഷ് ഹാളിലാണ് യോഗം നിശ്ചയിച്ചിരിക്കുന്നത്. വാകത്താനം, പാമ്പാടി, മീനടം, അയര്‍ക്കുന്നം എന്നിവടങ്ങളിലെ തെരഞ്ഞെടുപ്പ് കമ്മിറ്റി ഓഫീസുകള്‍ ഇന്ന് ഉദ്ഘാടനം ചെയ്തു.
സീറ്റ് ചര്‍ച്ചകള്‍ പൂര്‍ത്തിയായെങ്കിലും ചില മണ്ഡലങ്ങളിലെ സ്ഥാനാര്‍ഥികളെ ചൊല്ലി പ്രാദേശിക തലത്തില്‍ നടക്കുന്ന പ്രതിഷേധം തണുപ്പിക്കാന്‍ വരും ദിവസങ്ങളിലും ഉമ്മന്‍ ചാണ്ടി തലസ്ഥാനത്ത് തുടരും. രമേശ് ചെന്നിത്തലയും മുല്ലപ്പള്ളി രാമചന്ദ്രനും ഉമ്മന്‍ ചാണ്ടിയും പ്രാദേശിക നേതൃത്വവുമായി നടത്തുന്ന ചര്‍ച്ചകളോടെ പ്രതിഷേധങ്ങള്‍ തീരുമെന്നാണ് നേതൃത്വത്തിന്റെ പ്രതീക്ഷ. ഈ ചര്‍ച്ചകള്‍ക്ക് ശേഷം അദ്ദേഹം പുതുപ്പള്ളിയിലെ പ്രചരണത്തില്‍ സജീവമാകും.
