ദില്ലി: ആഭ്യന്തര കലാപം തുടരുന്ന സുഡാനില് നിന്ന് ഇന്ത്യക്കാരുമായി മൂന്നാമത്തെ വിമാനം ദില്ലിയില് എത്തി. 392 പേരുമായി വ്യോമസേനയുടെ സി17 ഗ്ലോബ് മാസ്റ്റര് വിമാനം ആണ് എത്തിയത്. നാല്പതോളം മലയാളികള് ഈ വിമാനത്തില് ഉണ്ടെന്നാണ് പ്രാഥമിക വിവരം. അല്പസമയത്തിനകം ഇവരെ കേരള ഹൗസിലേക്ക് മാറ്റും. സുഡാനില്നിന്ന് ഓപറേഷന് കാവേരിയിലൂടെ 1,100 പേരെ രക്ഷപ്പെടുത്തിയെന്ന് മന്ത്രി വി. മുരളീധരന് പറഞ്ഞു.
വ്യാഴാഴ്ച രാവിലെവരെ 1,100 ഇന്ത്യക്കാരെ ജിദ്ദയിലെത്തിച്ചിട്ടുണ്ട്. ഇതില് നിന്ന് 606 പേര് ഇതിനകം ഇന്ത്യയില് എത്തി. ഇതില് 27 മലയാളികളും ഉള്പ്പെടും. ജിദ്ദയില് എത്തിയ ബാക്കിയുള്ളവരെ വിമാനങ്ങളുടെ ലഭ്യത അനുസരിച്ച് നാട്ടിലെത്തിക്കും. വരും ദിവസങ്ങളില് സുഡാനില് കുടുങ്ങിയ കൂടുതല് ഇന്ത്യക്കാര് കൂടി പോര്ട്ട് സുഡാനില്നിന്ന് ഓപറേഷന് കാവേരി വഴി ജിദ്ദയിലെത്തും. ജിദ്ദയില് 24 മണിക്കൂറും പ്രവര്ത്തിക്കുന്ന കണ്ട്രോള് റൂം ആണ് പ്രവര്ത്തിക്കുന്നത്.
