തിരുവനന്തപുരം: പ്രതിപക്ഷ സമരം ജനങ്ങളോടുള്ള യുദ്ധപ്രഖ്യാപനമാണെന്ന് സി.പി.ഐ സംസ്ഥാന സെക്രട്ടറി കാനം രാജേന്ദ്രന്‍. സര്‍ക്കാറിനെ സംശയ നിഴലിലാക്കാനാണ് ബി.ജെ.പിയുടെ ശ്രമം. അതിനൊപ്പം ചേരുകയാണ് കോണ്‍ഗ്രസ് ചെയ്യുന്നതെന്നും അദ്ദേഹം പറഞ്ഞു.
എന്‍.ഐ.എ സെക്രട്ടറിയേറ്റിന് ചുറ്റം മാത്രമാണ് കറങ്ങുന്നത്. രാജസ്ഥാനില്‍ സി.ബി.ഐയെ ഉപയോഗിച്ച്‌ സര്‍ക്കാറിനെ അട്ടിമറിക്കാന്‍ ബി.ജെ.പി ശ്രമിക്കുകയാണെന്ന് ആരോപണമുന്നയിച്ച കോണ്‍ഗ്രസ് ഇവിടെ അവര്‍ക്കൊപ്പം നില്‍ക്കുകയാണ്. സി.പി.ഐ സംസ്ഥാന നിര്‍വാഹക സമിതിയില്‍ കെ.ടി ജലീലിനും മുഖ്യമന്ത്രി പിണറായി വിജയനും എതിരെ വിമര്‍ശനമുണ്ടായിട്ടില്ല. എല്‍.ഡി.എഫിനെ അടിക്കാനുള്ള വടിയല്ല സി.പി.ഐ. ഇതുമായി ബന്ധപ്പെട്ട പുറത്ത് വന്ന വാര്‍ത്തകള്‍ സത്യമല്ല. ഇടതുനിലപാടില്‍ നിന്ന് വ്യതിചലിക്കുമ്പോള്‍ വിമര്‍ശിക്കുന്നത് യുദ്ധ പ്രഖ്യാപനമല്ലെന്നും അദ്ദേഹം പറഞ്ഞു.
ദേശീയതലത്തില്‍ ബി.ജെ.പി സര്‍ക്കാറിനെതിരെ വലിയ പ്രതിഷേധം ഉയരുകയാണ്. തൊഴില്‍ നിയമഭേദഗതി, കാര്‍ഷിക ബില്‍ എന്നിവയിലാണ് പ്രതിഷേധം. ഇതിനിടെയാണ് ബി.ജെ.പിക്കൊപ്പം ചേര്‍ന്ന് കോണ്‍ഗ്രസ് കേരളത്തിലെ ഇടതു സര്‍ക്കാറിനെ ദുര്‍ബലപ്പെടുത്താന്‍ ശ്രമിക്കുന്നതെന്നും അദ്ദേഹം വ്യക്തമാക്കി.
