പത്തനംതിട്ട : അമിത ആത്മവിശ്വാസവും അതിരുകവിഞ്ഞ വിജയപ്രതീക്ഷയും പത്തനംതിട്ട ജില്ലയില് യു.ഡി.എഫിന് തിരിച്ചടിയാകും. മുന് കാലങ്ങളെ അപേക്ഷിച്ച് വാട്സ് ആപ്പ് ഗ്രൂപ്പ് ഉള്പ്പെടെയുള്ള സോഷ്യല് മീഡിയ പ്ലാറ്റ്ഫോമുകളില് യു.ഡി.എഫ് പ്രവര്ത്തകര് കൂടുതല് സജീവമാണ്. മീറ്റിങ്ങുകളും റോഡ് ഷോകളും പ്രവര്ത്തകരുടെ പങ്കാളിത്വംകൊണ്ട് ശ്രദ്ധേയമാണ്. അതുകൊണ്ടുതന്നെ പ്രവര്ത്തകരില് ആത്മവിശ്വാസവും കൂടുതലാണ്. ഒരു സ്ഥാനാര്ഥിയുടെ ജയപരാജയങ്ങള് നിശ്ചയിക്കുന്നത് നിഷ്പക്ഷ വോട്ടര്മാരാണ്. ഭരണവിരുദ്ധ വികാരം കേരളത്തില് ശക്തമാണെങ്കിലും നിഷ്പക്ഷ വോട്ടര്മാരില് ബഹുഭൂരിപക്ഷവും യു.ഡി.എഫിന്റെ പ്രവര്ത്തനങ്ങളില് അസന്തുഷ്ടരാണ്. സ്ഥാനാര്ഥി നിര്ണ്ണയത്തിലുണ്ടായ തര്ക്കങ്ങളും മുഖ്യമന്ത്രി കസേരക്കുവേണ്ടി മുതിര്ന്ന നേതാക്കള് തമ്മിലുള്ള പിടിവലിയും യു.ഡി.എഫിന്റെ വിജയ പ്രതീക്ഷകള്ക്ക് മങ്ങലേല്പ്പിച്ചിട്ടുണ്ട്.
എന്നാല് യഥാര്ഥ വസ്തുതകള് പഠിക്കുവാനോ പാളിച്ചകള് തിരുത്തുവാനോ യു.ഡി.എഫ് തയ്യാറാകുന്നില്ല. ഭരണവിരുദ്ധ വികാരത്തിന്റെ ഓളത്തില് തങ്ങള് എല്ലാവരും വന് ഭൂരിപക്ഷത്തില് വിജയിക്കുമെന്ന കണക്കുകൂട്ടലില്തന്നെയാണ് ജില്ലയിലെ യു.ഡി.എഫ് സ്ഥാനാര്ഥികളും പ്രവര്ത്തകരും. പിണറായി സര്ക്കാരിന്റെ കഴിഞ്ഞ പത്തുവര്ഷത്തെ തുടര്ച്ചയായ ഭരണത്തില് നിന്നും ഉടലെടുത്ത വിരുദ്ധ വികാരം ശരിയായി ഉപയോഗിക്കുവാന് പ്രതിപക്ഷത്തിന് ഇപ്പോഴും കഴിഞ്ഞിട്ടില്ലെന്നു തന്നെ പറയാം. എന്നാല് ഈ ഭരണവിരുദ്ധ വികാരത്തെ മറികടക്കുവാനുള്ള എല്ലാ പ്രവര്ത്തനങ്ങളും പ്രചാരണങ്ങളും ഇടതുപക്ഷം വളരെ ആസൂത്രിതമായി ചെയ്യുന്നുണ്ട്. അതിന്റെ പ്രതിഫലനങ്ങള് ഓരോ മണ്ഡലത്തിലും അനുഭവപ്പെട്ടു തുടങ്ങിയിട്ടുമുണ്ട്. നിഷ്പക്ഷ വോട്ടര്മാരെ ഇത് വളരെയേറെ സ്വാധീനിച്ചിട്ടുണ്ട്.
