റാന്നി : മന്ദമരുതി – വെച്ചൂച്ചിറ റോഡിൽ പടര്‍ന്നുകയറിയ ഇഞ്ച മുള്ളുകളും കാടും യാത്രക്കാർക്ക് ഭീഷണിയാകുന്നു. കുംഭിത്തോടിന് സമീപമുള്ള വാട്ടർ അതോറിറ്റി പമ്പ് ഹൗസിന് അടുത്താണ് റോഡിലേക്ക് ഇഞ്ചപ്പടർപ്പ് വ്യാപകമായി വളർന്നുനിൽക്കുന്നത്. ഉന്നത നിലവാരത്തിൽ നിർമ്മാണം പുരോഗമിക്കുന്ന ഈ റോഡിന്റെ ബി.എം. ടാറിങും വശങ്ങളിലെ ഐറിഷ് ഓടയുടെ നിര്‍മ്മാണവും നേരത്തെ പൂർത്തിയായിരുന്നു. എന്നാൽ റോഡിന്റെ രണ്ടാം ഘട്ട നിർമ്മാണ പ്രവർത്തനങ്ങൾ നിലവില്‍ ഇഴഞ്ഞു നീങ്ങുകയാണെന്നാണ് നാട്ടുകാരുടെ പരാതി. റോഡിലേക്ക് പടർന്നുനിൽക്കുന്ന ഇഞ്ച മുള്ളുകള്‍ കാരണം കാൽനടയാത്രക്കാരും ഇരുചക്രവാഹന യാത്രക്കാരും ഏറെ ബുദ്ധിമുട്ടിലാണ്.
എതിർ ദിശയിൽ നിന്ന് വാഹനങ്ങൾ വരുമ്പോൾ കാല്‍നട യാത്രക്കാര്‍ക്ക് വശങ്ങളിലേക്ക് ഒതുങ്ങി കൊടുക്കുവാൻ കഴിയാത്ത സ്ഥിതിയാണുള്ളത്. കാടുമൂടിയ ഭാഗങ്ങളിൽ കാൽനട യാത്രക്കാർക്ക് മുള്ളുകൊണ്ട് പരിക്കേൽക്കുവാനും അപകടങ്ങൾ ഉണ്ടാകുവാനും സാധ്യതയേറെയാണ്. റോഡിലെ കാഴ്ച മറയ്ക്കുന്ന രീതിയിൽ വളർന്നുനിൽക്കുന്ന ഇഞ്ച മുള്ളുകളും കാടുകളും വെട്ടി മാറ്റുവാനും ഇഴഞ്ഞുനീങ്ങുന്ന രണ്ടാം ഘട്ട നിർമ്മാണം വേഗത്തിലാക്കുവാനും അധികൃതർ അടിയന്തിരമായി ഇടപെടണമെന്ന് യാത്രക്കാരും നാട്ടുകാരും ആവശ്യപ്പെട്ടു.
