റാന്നി : താലൂക്ക് ആശുപത്രിക്ക് തൊണ്ണൂറ് ലക്ഷം രൂപയുടെ ഓക്സിജന്‍ പ്ലാന്‍റടക്കം 1.5 കോടി രൂപയുടെ ആശുപത്രി ഉപകരണങ്ങളുമായി സന്നദ്ധ സംഘടന. ”ഡോക്ടേര്‍സ് ഫോര്‍ യു” എന്ന സംഘടനയാണ് സഹായവുമായി എത്തിയത്. റാന്നി എം.എല്‍.എ അഡ്വ. പ്രമോദ് നാരായണന്റെ ശ്രമഫലമായിട്ടാണ് ആശുപത്രിക്ക് സഹായമെത്തുന്നത്. ഇതോടെ ജില്ലയിലെ എല്ലാ സൗകര്യങ്ങളുമുള്ള പ്രധാന ആശുപത്രിയായി താലൂക്ക് ആശുപത്രി മാറും.
നിലവിൽ ഈ സംഘടനയില്‍ നിന്നും 21 ലക്ഷം രൂപയുടെ ആശുപത്രി ഉപകരണങ്ങൾ ഇവിടെ നല്‍കിയിട്ടുണ്ട്. ഓക്സിജൻ പ്ലാന്റ് സ്ഥാപിക്കുന്ന സ്ഥലം അഡ്വ. പ്രമോദ് നാരായണ്‍ എം.എല്‍.എ, ഗിവ് ഇന്ത്യാ പ്രതിനിധി ഉമാശങ്കർ ശർമ്മ, ഡോക്ടേര്‍സ് ഫോര്‍ യു പ്രതിനിധി അബ്ദുള്ള ആസാദ്‌, ബ്ലോക്ക് പഞ്ചായത്ത് പ്രസിഡന്റ്‌ കെ. എസ്. ഗോപി, ബ്ലോക്ക് പഞ്ചായത്തംഗം ജേക്കബ് സ്റ്റീഫൻ, പി. ആർ. പ്രസാദ് എന്നിവർ സന്ദർശിച്ചു. അടിയന്തിരമായി പ്ലാന്റ് പ്രവർത്തനക്ഷമമാക്കുന്നതിന് ആവശ്യമായ നടപടികൾ സ്വീകരിക്കാന്‍ തീരുമാനിച്ചു.
