തിരുവനന്തപുരം : നീതി ആയോഗിന്റെ റിപ്പോർട്ട്, യുഡിഎഫ് സര്ക്കാര് പട്ടിണിക്കെതിരെ നടത്തിയ പോരാട്ടത്തിന്റെ വിജയമാണെന്ന് മുന് മുഖ്യമന്ത്രി ഉമ്മന് ചാണ്ടി. 2015-16ല് ബിഹാറില് 51.91% ജനങ്ങള് പട്ടിണിയിലായിരുന്നപ്പോള് കേരളത്തിലന്ന് 0.71% ജനങ്ങള് മാത്രമായിരുന്നു. യുഡിഎഫ് സര്ക്കാരിന്റെ കാലത്ത് നൽകിയ സൗജന്യ റേഷന്, കാരുണ്യ ചികിത്സാ സഹായം, അവശ്യമരുന്നുകളുടെ സൗജന്യ വിതരണം, നിത്യോപയോഗ സാധനങ്ങളുടെ വില നിയന്ത്രിക്കാന് ശക്തമായ ഇടപെടല്, തൊഴിലുറപ്പ് പദ്ധതി വ്യാപകമാക്കല്, സ്കൂള് വിദ്യാര്ഥികള്ക്ക് മുട്ട ഉള്പ്പെടെ സൗജന്യ ഭക്ഷണം തുടങ്ങിയ നിരവധി പദ്ധതികളാണ് പട്ടിണിക്കെതിരെ കവചമൊരുക്കിയത്.
100 ശതമാനം സാക്ഷരത ആദ്യം കൈവരിച്ച കോട്ടയം ജില്ല, രാജ്യത്ത് ദരിദ്രരില്ലാത്ത ഏക ജില്ലയായി മാറിയതും അഭിമാനകരമാണെന്ന് ഉമ്മന് ചാണ്ടി ചൂണ്ടിക്കാട്ടി. മഹാമാരിയും പ്രകൃതി ദുരന്തങ്ങളുമുള്പ്പെടെ നിരവധി വെല്ലുവിളികള് നേരിടേണ്ടി വന്നിട്ടും ജനക്ഷേമം ഉറപ്പുവരുത്താനായി ഇടതുസര്ക്കാര് നടത്തിയ വിട്ടുവീഴ്ചയില്ലാത്ത പ്രവര്ത്തനങ്ങള് ഈ നേട്ടത്തിന്റെ അടിത്തറ പാകി എന്ന് മുഖ്യമന്ത്രി പിണറായി വിജയന് അഭിപ്രായപ്പെട്ടത് തെറ്റിദ്ധാരണ മൂലമാകാമെന്നും ഉമ്മൻചാണ്ടി പറഞ്ഞു. നേട്ടത്തില് മുഖ്യമന്ത്രി അഭിമാനം പ്രകടിപ്പിച്ചനെ സ്വാഗതം ചെയ്യുന്നുവെന്നും അദ്ദേഹം വ്യക്തമാക്കി.
