മലപ്പുറം: പിഎം ശ്രീ പദ്ധതിയെക്കുറിച്ച് ഇന്നലെ യുഡിഎഫ് യോഗത്തിൽ യാതൊരു ചർച്ചയും നടന്നിട്ടില്ലെന്ന് മുസ്ലിം ലീഗ് ദേശീയ ജനറൽ സെക്രട്ടറി പി.കെ. കുഞ്ഞാലിക്കുട്ടി. യുഡിഎഫിൽ കോൺഗ്രസും മുസ്ലിം ലീഗും വ്യത്യസ്ത നിലപാട് സ്വീകരിച്ചെന്ന വാർത്തകൾ അടിസ്ഥാനരഹിതമാണെന്നും അദ്ദേഹം പറഞ്ഞു. പിഎം ശ്രീ വിഷയത്തിൽ നിലവിലെ നിലപാട് മാറ്റമില്ലെന്നും മന്ത്രിസഭ നിയോഗിച്ച സബ് കമ്മിറ്റി റിപ്പോർട്ട് സമർപ്പിച്ച ശേഷം സർക്കാർ അന്തിമ നിലപാട് വ്യക്തമാക്കുമെന്നും കുഞ്ഞാലിക്കുട്ടി പറഞ്ഞു. അതിന് ശേഷമേ യുഡിഎഫും ഔദ്യോഗിക അഭിപ്രായം പ്രഖ്യാപിക്കൂവെന്നും അദ്ദേഹം പറഞ്ഞു.
ഇടത് സർക്കാർ ഒപ്പുവെച്ച പദ്ധതിയാണ് പിഎം ശ്രീയെന്നും അതിന്റെ നിയമപരവും സാങ്കേതികവുമായ സങ്കീർണതകൾ നിയമസഭയിൽ സർക്കാർ തന്നെ സമ്മതിച്ചിരുന്നുവെന്നും കുഞ്ഞാലിക്കുട്ടി ചൂണ്ടിക്കാട്ടി. ഫണ്ട് നഷ്ടമാകുമെന്ന ആശങ്കയിലാണ് അന്ന് ധാരണാപത്രത്തിൽ ഒപ്പുവെച്ചതെന്നും ഇനി പദ്ധതിയിൽ നിന്ന് എങ്ങനെ പിന്മാറാമെന്നത് സബ് കമ്മിറ്റി പരിശോധിക്കുമെന്നും അദ്ദേഹം പറഞ്ഞു. കേരളത്തിൽ കേന്ദ്രം നിർദേശിച്ച നിബന്ധനകൾ പാലിച്ച് പദ്ധതി നടപ്പാക്കാൻ അനുവദിക്കില്ലെന്നും അത്തരമൊരു സാഹചര്യം ഉണ്ടായാൽ അപ്പോൾ തന്നെ യുഡിഎഫ് ആവശ്യമായ തീരുമാനം സ്വീകരിക്കുമെന്നും കുഞ്ഞാലിക്കുട്ടി വ്യക്തമാക്കി.
