മരട് : എറണാകുളം മരടില് പിഡബ്ല്യുഡി റോഡില് നിര്മാണം പൂര്ത്തിയാകാത്ത പകല്വീടിന്റെ ശിലാഫലകം സ്ഥാപിച്ചത് വിവാദമായി മാറിയതോടെ പൊളിച്ചു നീക്കി അധികൃതര്. മരട് നഗരസഭ ഒന്നാംഡിവിഷനിലാണ് ഉദ്ഘാടനം ചെയ്തെന്ന തരത്തില് ശിലാഫലകം സ്ഥാപിച്ചത്. ഇത് വാര്ത്തയായി മാറിയിരുന്നു. ഇതിനുപിന്നാലെയാണ് മരട് നഗരസഭ ചെയര്മാന് ആന്റണി ആശാന്പറമ്പിലിന്റെ നേതൃത്വത്തില് നഗരസഭ അധികൃതരെത്തി ശിലാഫലകം നീക്കംചെയ്തത്.
കഴിഞ്ഞ ജനുവരിയില് സര്ക്കാര് പുറത്തിറക്കിയ ഉത്തരവ് കാറ്റില് പറത്തിയാണ് നിര്മാണപ്രവര്ത്തനങ്ങള് പൂര്ത്തിയാകാത്ത പകല്വീട് ഉദ്ഘാടനം ചെയ്യാന് തീരുമാനിച്ചതെന്ന് ചൂണ്ടിക്കാട്ടി പൊതുപ്രവര്ത്തകനായ തോമസ് നെട്ടൂര് നഗരസഭ സെക്രട്ടറിക്ക് പരാതി നല്കിയിരുന്നു. മുന് എം.എല്.എ എം.സ്വരാജിന്റെ ഫണ്ടുപയോഗിച്ച് നിര്മിച്ചതായിരുന്നു പകല്വീട്. കെട്ടിടത്തിന്റെ ഇലക്ട്രിക്, പ്ലംബിങ് ജോലി തീര്ക്കാതെയാണ് ഉദ്ഘാടനം നടത്താന് തീരുമാനിച്ചത്. എന്നാല് ശിലാഫലകം സ്ഥാപിച്ചത് തങ്ങളുടെ അറിവോടെയല്ലെന്നാണ് നഗരസഭ ചെയര്മാന് പറയുന്നത്