പാലക്കാട്; പട്ടാപ്പകല്‍ വീട്ടില്‍ അതിക്രമിച്ചു കയറി വീട്ടമ്മയെ കെട്ടിയിട്ട് കവര്‍ച്ച നടത്തിയ കേസില്‍ മുഖ്യപ്രതികള്‍ അറസ്റ്റില്‍. പുതുനഗരം സ്വദേശികളായ തൗഫീഖ്, വിമല്‍, ബഷീറുദ്ദീന്‍ എന്നിവരാണ് അറസ്റ്റിലായത്. കല്‍മണ്ഡപത്ത് പട്ടാപ്പകല്‍ വീട്ടമ്മയെ കെട്ടിയിട്ട് 57 പവന്‍ സ്വര്‍ണ്ണാഭരണങ്ങളും ഒന്നരലക്ഷം രൂപയും കവര്‍ന്ന കേസില്‍ വീട്ടുടമസ്ഥന്റെ മെഡിക്കല്‍ ഷോപ്പിലെ ജീവനക്കാരനായ തൗഫീഖാണ് മുഖ്യ സൂത്രധാരന്‍.
കത്തികാട്ടി ഭീഷണിപ്പെടുത്തിയശേഷം വീട്ടമ്മയെ കെട്ടിയിട്ട് അലമാര കുത്തിത്തുറന്ന് 57 പവന്‍ സ്വര്‍ണാഭരണവും ഒന്നര ലക്ഷം രൂപയും കവരുകയായിരുന്നു. കഴിഞ്ഞ 13നു രാവിലെ 10.45നും 11.45നും ഇടയ്ക്കായിരുന്നു കേസിനാസ്പദമായ സംഭവം. കല്‍മണ്ഡപം പ്രതിഭാനഗറില്‍ അന്‍സാരിയുടെ ഭാര്യ ഷെഫീനയാണ് ആക്രമണത്തിനിരയായത്. ഷെഫീന വീട്ടില്‍ തനിച്ചായിരിക്കെ, മുന്‍വാതില്‍ തുറന്ന് അകത്തുകയറിയ സംഘം കത്തികാട്ടി ഭീഷണിപ്പെടുത്തുകയും വായില്‍ തുണിതിരുകി സെല്ലോടേപ്പ് ഉപയോഗിച്ച് ബന്ധിക്കുകയും ചെയ്തു. തുടര്‍ന്നു മുറിക്കുള്ളില്‍ കയറി അലമാര തകര്‍ത്ത് ആഭരണങ്ങളും പണവും കവര്‍ന്ന സംഘം വീട്ടിലെ ബൈക്കുമായാണു പുറത്തിറങ്ങിയത്. പിന്നീട് നൂറു മീറ്റര്‍ അകലെ ബൈക്ക് ഉപേക്ഷിച്ച് ഓട്ടോറിക്ഷയില്‍ രക്ഷപ്പെടുകയായിരുന്നു. നേരത്തെ 4 പ്രതികള്‍ പോലീസ ്പിടിയിലായിരുന്നു.
