കാസര്ഗോഡ് : ഏഴു പേരുടെ മരണത്തിനിടയാക്കിയ കാസര്കോട് പാണത്തൂര് ബസ് അപകടത്തിന് കാരണം ഡ്രൈവറുടെ അശ്രദ്ധയാണെന്ന് മോട്ടോര് വാഹന വകുപ്പ്. ബസ് പരിശോധിച്ച റീജണല് ട്രാന്സ്പോര്ട്ട് ഓഫീസറടങ്ങിയ സംഘം സാങ്കേതിക തകരാര് സംഭവിച്ചിട്ടില്ലെന് കണ്ടെത്തി. അമിതവേഗവും ഡ്രൈവറുടെ അശ്രദ്ധയുമാണ് അപകടത്തിന് കാരണമെന്ന് ഡെപ്യൂട്ടി കലക്ടര് നടത്തിയ പരിശോധനയിലും കണ്ടെത്തിയിരുന്നു.
കര്ണാടകയില് നിന്നുള്ള വിവാഹ സംഘം സഞ്ചരിച്ച ബസ് സുള്ള്യ പാണത്തൂര് റോഡിലെ ഇറക്കത്തില് നിയന്ത്രണം വിട്ട് റോഡരികിലെ കെട്ടിടത്തിന്റെ സണ്ഷൈഡിലും മരങ്ങളിലും ഇടിച്ച ശേഷം തലകീഴായി താഴെയുള്ള വീടിനു മുകളിലേക്ക് മറിയുകയായിരുന്നു. അപകടത്തില്പെട്ട ബസ് മോട്ടോര് വാഹന വകുപ്പിലെ ഉന്നത ഉദ്യോഗസ്ഥരടങ്ങിയ സംഘം വിശദമായി പരിശോധിച്ചു.
ബസിന് യന്ത്ര തകരാറുകളൊന്നും ഇല്ലെന്ന് പരിശോധനയില് ബോധ്യപ്പെട്ടു. ബസില് അനുവദനീയമായതിലും കൂടുതല് ആള്ക്കാരുണ്ടായിരുന്നതാണ് അപകടത്തിന്റെ ആഘാതം വര്ധിപ്പിച്ചത്. കര്ണാടകയിലെ ലൈന് ബസ് ആണ് വിവാഹ ആവശ്യത്തിനായി ഉപയോഗിക്കുകയായിരുന്നു. ബസിന് അന്തര് സംസ്ഥാന സര്വീസിന് അനുമതി ഉണ്ടായിരുന്നോ എന്നതടക്കമുള്ള കാര്യങ്ങളും അധികൃതര് പരിശോധിക്കുന്നുണ്ട്
