വടശേരിക്കര : 479 കിലോ പ്ലാസ്റ്റിക് ക്ലീൻ കേരള കമ്പനിക്കു കൈമാറി വടശേരിക്കര പഞ്ചായത്ത്. ശബരിമല തീർഥാടനത്തിനു മുന്നോടിയായി എംസിഎഫിലും പുറത്തെ സ്റ്റാളിലും സംഭരിച്ചിരുന്ന മാലിന്യമാണ് കമ്പനി ഏറ്റെടുത്തത്. ഹരിത കർമ സേനയുടെ നേതൃത്വത്തിൽ പഞ്ചായത്തിലെ 15 വാർഡുകളിൽനിന്ന് അജൈവ മാലിന്യം സംഭരിക്കുന്നുണ്ട്. അവ പഞ്ചായത്തിന്റെ വാഹനത്തിൽ വടശേരിക്കര ചന്തയിൽ നിർമിച്ചിട്ടുള്ള എംസിഎഫിൽ എത്തിക്കുകയാണ്.
പിന്നീട് തരംതിരിച്ച് പ്ലാസ്റ്റിക് പ്രത്യേകമായി സൂക്ഷിക്കും. ഉപയോഗമില്ലാത്ത മാലിന്യങ്ങളും ക്ലീൻ കേരള കമ്പനി ഏറ്റെടുക്കും. പഞ്ചായത്ത് പ്രസിഡന്റ് ലത മോഹൻ, വൈസ് പ്രസിഡന്റ് ഒ.എൻ.യശോധരൻ എന്നിവരുടെ നേതൃത്വത്തിലാണ് മാലിന്യം കൈമാറിയത്. ഇതോടെ ശബരിമല തീർഥാടന കാലത്ത് സംഭരിക്കുന്ന പ്ലാസ്റ്റിക് മാലിന്യം സംഭരിക്കാൻ ഇടമായി.
