പത്തനംതിട്ട : പന്തളം നഗരസഭ കൗണ്‍സിലിന്‍റെ പ്രവര്‍ത്തനം ചട്ടങ്ങളും നിയമങ്ങളും പാലിക്കാതെയാണെന്നും ബഡ്ജറ്റ് സമയബന്ധിതമായി അവതരിപ്പിച്ചില്ലെന്നും കാണിച്ച് മുനിസിപ്പല്‍ സെക്രട്ടറി തന്നെ ഗവണ്‍മെന്‍റ് സെക്രട്ടറിക്ക് പരാതി നൽകിയ സാഹചര്യത്തില്‍ കൗണ്‍സില്‍ പിരിച്ചുവിടണമെന്ന് ജില്ലാ കോണ്‍ഗ്രസ്സ് കമ്മിറ്റി പ്രസിഡന്റ് സതീഷ് കൊച്ചുപറമ്പില്‍ ആവശ്യപ്പെട്ടു.
പരാതിയുടെ അടിസ്ഥാനത്തില്‍ പന്തളം നഗരസഭയില്‍ ഭരണസ്തംഭനം നിലനില്‍ക്കുകയാണ്. സാധാരണക്കാരന് ലഭിക്കേണ്ട ആനുകൂല്യങ്ങള്‍ ലഭിക്കാതായിരിക്കുന്നു. അധികാരത്തിലേറി ഒന്‍പതു മാസമായിട്ടും സമസ്ത മേഖലയിലും പരാജയപ്പെട്ട ബി.ജെ.പി നേതൃത്വത്തിലുള്ള ഭരണസമിതിക്കെതിരെ ജന രോഷമുയര്‍ന്നുകഴിഞ്ഞു. നിയമപരമല്ലാതെ പ്രവര്‍ത്തിച്ച മുനിസിപ്പല്‍ കൗണ്‍സില്‍ പിരിച്ചുവിടണമെന്നും അദ്ദേഹം പറഞ്ഞു.
