കോഴിക്കോട് : പന്തീരങ്കാവ് യുഎപിഎ കേസില്‍ പോലീസിന് വീഴ്ച സംഭവിച്ചു. വിമര്‍ശനവുമായി സിപിഎം കോഴിക്കോട് സൗത്ത് ഏരിയ സമ്മേളനം. അലനെയും താഹയെയും മാവോയിസ്റ്റ് ബന്ധം ആരോപിച്ച് അറസ്റ്റ് ചെയ്ത നടപടിയില്‍ ജാഗ്രത കുറവ് ഉണ്ടായെന് രണ്ട് ലോക്കല്‍ കമ്മിറ്റികള്‍ വിമര്‍ശിച്ചു. പന്തീരാങ്കാവ് യുഎപിഎ കേസില്‍ താഹായ്ക്ക് ജാമ്യം നല്‍കുകയും അലന്റെ ജാമ്യം ശരി വയ്ക്കുകയും ചെയ്ത ശേഷം സുപ്രീംകോടതി നടത്തിയ പരാമര്‍ശങ്ങള്‍ ചൂണ്ടിക്കാട്ടിയാണ് രണ്ടു ലോക്കല്‍ കമ്മറ്റികള്‍ പോലീസിനെതിരെ വിമര്‍ശനം ഉന്നയിച്ചത്.
പോലീസിന് ഇക്കാര്യത്തില്‍ വലിയ വീഴ്ച്ച സംഭവിച്ചു. വിഷയം പഠിക്കാതെ കേസെടുക്കാന്‍ ധൃതി കാട്ടുകയാണ് ചെയ്തത്. അലനും താഹയും പാര്‍ട്ടിക്കുടുംബമാണ്. ആത്യന്തികമായി പാര്‍ട്ടിക്ക് നഷ്ടമാണുണ്ടായതെന്നും പ്രതിനിധികള്‍ ചൂണ്ടിക്കാട്ടി. യുഎപിഎയില്‍ പാര്‍ട്ടി നിലപാട് എന്താണെന്ന് വിശദീകറിക്കണമെന്നും ആവശ്യം ഉയര്‍ന്നു.
പോലീസിന് വഴങ്ങി പാര്‍ട്ടി നിലപാടില്‍ നിന്ന് പിന്നോക്കം പോകേണ്ടി വന്ന സാഹചര്യം ഒഴിവാക്കണമായിരുന്നു. പരോക്ഷമായി ആഭ്യന്തര വകുപ്പിന്റെ വീഴ്ച്ചയാണ് പ്രതിനിധികള്‍ അക്കമിട്ട് നിരത്തിയത്. അലനും താഹയും അറസ്റ്റിലായപ്പോള്‍ പന്തീരങ്കാവ് ലോക്കല്‍ കമ്മിറ്റി തുടക്കത്തില്‍ പോലീസ് നിലപാടിന് എതിരായിരുന്നു. ജില്ലാ കമ്മിറ്റി കണ്ണുരുട്ടുകയും മുഖ്യമന്ത്രിയുടെ പരാമര്‍ശം ചര്‍ച്ചയാവുകയും ചെയ്തതോടെ പന്തീരങ്കാവ് ലോക്കല്‍ കമ്മിറ്റി പിന്‍വാങ്ങുകയായിരുന്നു.
