കോഴിക്കോട് : സമാന്തര ടെലിഫോണ് എക്സ്ചേഞ്ച് കേസ് ദേശീയ അന്വേഷണ ഏജന്സിയായ എന്ഐ എ രണ്ടാഴ്ച്ചക്കകം ഏറ്റെടുക്കും. എന്ഐഎ സംഘം കോഴിക്കോട് ജില്ലാക്രൈബ്രാഞ്ച് ഓഫിസിലെത്തി കേസുമായി ബന്ധപ്പെട്ട വിവരങ്ങള് ശേഖരിച്ചു. തീവ്രവാദ ബന്ധം പുറത്തുവന്ന പശ്ചാത്തലത്തിലാണ് കേസ് എന്ഐഎ ഏറ്റെടുക്കുന്നതെന്നാണ് വിവരം.
ഗള്ഫ് രാജ്യങ്ങള്ക്ക് പുറമേ പാക്കിസ്ഥാന്, ചൈന, ബംഗ്ലാദേശ് എന്നീ രാജ്യങ്ങളില് നിന്ന് സമാന്തര ടെലിഫോണ് എക്സ്ചേഞ്ച് വഴി ഇന്ത്യയിലേയ്ക്കും തിരിച്ചും ബന്ധപ്പെട്ടിരുന്നതായി അന്വേഷണ സംഘം കണ്ടെത്തിയിരുന്നു. തീവ്രവാദ പ്രവര്ത്തനങ്ങള്ക്കായാണ് ഈ റൂട്ടുകള് ഉപയോഗിച്ചിരുന്നതെന്ന് അന്വേഷണ സംഘം പറയുന്നു. കേസില് അറസ്റ്റിലായ ഇബ്രാഹിം പുല്ലോട്ടിലിന്റെ മൊഴിയും സമാനരീതിയില് ആയിരുന്നു. സൈനിക നീക്കങ്ങള് അടക്കം ചോര്ത്താന് ശ്രമം നടന്നുവെന്ന സംശയവും അന്വേഷണ സംഘത്തിനുണ്ട്.
സമാന്തര ടെലിഫോണ് എക്സ്ചേഞ്ച് കേസില് അന്വേഷണം നയതന്ത്ര സ്വര്ണകടത്ത് കേസിലെ പ്രതി കെടി റമീസിലേക്കും നീളുന്നു. തെലങ്കാനയില് സമാനകേസില് പിടിയിലായ തൊടുപുഴ സ്വദേശി റസല്, കെടി റമീസിന് വേണ്ടി താന് നിരവധി തവണ സ്വര്ണം കടത്തിയിട്ടുണ്ടെന്ന് മൊഴി നല്കിയതായാണ് വിവരം. അന്വേഷണ സംഘം ഇയാളെ ഹൈദരാബാദിലെത്തി ചോദ്യം ചെയ്യും.
രണ്ടാം തവണയാണ് എന്ഐഎ കേസുമായി ബന്ധപ്പെട്ട വിവരങ്ങള് ശേഖരിക്കുന്നത്. കേസ് രണ്ടാഴ്ച്ചയ്ക്കകം എന്ഐഎ ഏറ്റെടുക്കുന്നതോടെ കൂടുതല് പേരിലേക്ക് നീളും.
സമാന്തര ടെലിഫോണ് എക്സ്ചേഞ്ച് കേസിലെ ബുദ്ധികേന്ദ്രങ്ങളായ രണ്ട് മുഖ്യപ്രതികള് കേരളം വിട്ടിരുന്നു. കോഴിക്കോട് മൂര്യാട് സ്വദേശികളായ ഷബീര്, പ്രസാദ് എന്നിവരാണ് ബംഗളുരുവിലേക്ക് കടന്നതായി പൊലീസിന് വിവരം ലഭിച്ചത്.
