ന്യൂഡല്ഹി: വടക്ക് കിഴക്കന് ഡല്ഹിയിലെ കലാപങ്ങള് ചര്ച്ച ചെയ്യണമെന്ന ആവശ്യത്തില് പാര്ലമെന്റ് മൂന്നാം ദിവസവും സ്തംഭിച്ചു. പ്രതിപക്ഷ അംഗങ്ങളുടെ ബഹളത്തെ തുടര്ന്ന് ലോക്സഭാ നടപടികള് ഉച്ചക്ക് 12 മണിവരെയും പിന്നീട് രണ്ട് മണിവരെയും നിര്ത്തിവെച്ചു. രാജ്യസഭ ഇന്നത്തേക്ക് പിരിഞ്ഞു.
ഡല്ഹി കലാപം ലോക്സഭാ നടപടികള് നിര്ത്തിവെച്ച് ചര്ച്ച ചെയ്യണമെന്ന് കോണ്ഗ്രസ് ആവശ്യപ്പെട്ടു. കോണ്ഗ്രസ് ലോക്സഭാ കക്ഷി നേതാവ് ആധിര് രഞ്ജന് ചൗധരി, പാര്ട്ടി എം.പിമാരായ മണികാം ടാഗോര്, മനീഷ് തിവാരി, ജസ്ബിര് സിങ് ഗില് എന്നിവരാണ് അടിയന്തര പ്രമേയത്തിന് നോട്ടീസ് നല്കിയത്. രാജ്യസഭാ നടപടികള് നിര്ത്തിവെച്ച് ചര്ച്ച ചെയ്യണമെന്ന് സമാജ് വാദി പാര്ട്ടി എം.പി രാം ഗോപാല് യാദവാണ് അടിയന്തര പ്രമേയത്തിലൂടെ ആവശ്യപ്പെട്ടത്.
അതോടൊപ്പം ലോക്സഭയില് പ്രതിപക്ഷ അംഗങ്ങളെ ഭരണപക്ഷ അംഗങ്ങള് കൈയ്യേറ്റം ചെയ്ത സംഭവത്തില് കേന്ദ്രസര്ക്കാര് ചര്ച്ചക്ക് തയാറാകണമെന്ന് കോണ്ഗ്രസ് ആവശ്യപ്പെട്ടു. ഡല്ഹി കലാപവും ആധിര് രഞ്ജന് ചൗധരിയുടെ ഡല്ഹിയിലെ വസതിക്ക് നേരെ നടന്ന ആക്രമണവും ചര്ച്ച ചെയ്യാന് രാഹുല് ഗാന്ധി കോണ്ഗ്രസ് എം.പിമാരുടെ അടിയന്തര യോഗം വിളിച്ചു. ഡല്ഹി കലാപത്തില് കേന്ദ്ര ആഭ്യന്തര മന്ത്രി അമിത് ഷായുടെ രാജി ആവശ്യപ്പെട്ട് ഇടത് എം.പിമാര് പാര്ലമെന്റ് വളപ്പിലെ ഗാന്ധി പ്രതിമക്ക് മുമ്പില് പ്രതിഷേധ ധര്ണ നടത്തി.