കോട്ടയം : പി.ജെ. ജോസഫിനൊപ്പം നിലയുറപ്പിച്ചവരെ തിരികയെത്തിക്കാനുള്ള ജോസ് കെ. മാണിയുടെ ശ്രമങ്ങള്ക്കിടെ, നിലപാടില് മാറ്റമില്ലെന്ന് വ്യക്തമാക്കി സി.എഫ്. തോമസ് എം.എല്.എ. നിലവിലൊരു നിലപാട് എടുത്തിട്ടുണ്ട്. അത് തുടരും. തെരഞ്ഞെടുപ്പ് കമ്മീഷന്റെ വിധി അതിനെ ബാധിക്കില്ല.
കൃത്യമായ ബോധ്യങ്ങളില്നിന്നായിരുന്നു തീരുമാനമെന്നും സി.എഫ്. തോമസ് വ്യക്തമാക്കി. നേരത്തേ പാര്ട്ടിയില് ഭിന്നത രൂപപ്പെട്ടതോടെ ഔദ്യോഗിക കേരള കോണ്ഗ്രസിനൊപ്പമായിരിക്കും താനെന്നായിരുന്നു അദ്ദേഹത്തിന്റെ പ്രതികരണം. പാര്ട്ടി ചിഹ്നവും പേരും ജോസ് കെ. മാണി ചെയര്മാനായ വിഭാഗത്തിനാണെന്ന് തെരഞ്ഞെടുപ്പ് കമ്മീഷന് വിധിച്ചതോടെ അദ്ദേഹം നിലപാട് മാറ്റുമെന്ന് അഭ്യൂഹം പ്രചരിച്ചിരുന്നു.
അതിനിടെ നേതാക്കളെ മടക്കിയെത്തിക്കാനുള്ള നീക്കങ്ങള് ജോസ് കെ. മാണിക്കൊപ്പമുള്ളവര് ശക്തമാക്കി. രണ്ടാംനിര നേതാക്കളെയാണ് ലക്ഷ്യമിടുന്നത്. ഇതിനായി ജില്ല നേതൃയോഗങ്ങള് വിളിച്ചിട്ടുണ്ട്. പാര്ട്ടി വിട്ടവരുടെ പട്ടികയും ഇതില് തയാറാക്കും. തുടര്ന്ന് ജില്ല പ്രസിഡന്റുമാര് ഇവരുമായി ബന്ധപ്പെടാനാണ് ധാരണ. കൂറുമാറ്റനിരോധന നിയമപ്രകാരം നടപടിയുണ്ടാകുമെന്ന് തദ്ദേശസ്ഥാപന പ്രതിനിധികള്ക്ക് മുന്നറിയിപ്പും നല്കുന്നുണ്ട്. എന്നാല് ആരും മറുവിഭാഗത്തിലേക്ക് പോകില്ലെന്നാണ് ജോസഫിനൊപ്പം നില്ക്കുന്നവര് പറയുന്നത്.
