പീരുമേട് : ദിവസേന ആയിരക്കണക്കിന് വിനോദസഞ്ചാരികള് എത്തുന്ന പരുന്തുംപാറയെ ടൂറിസം കേന്ദ്രമായി പ്രഖ്യാപിച്ച ടൂറിസം വകുപ്പിന്റെ നടപടിയെ പീരുമേട് റിസോര്ട്ട് ഓണേഴ്സ് അസോസിയേഷന് സ്വാഗതം ചെയ്തു. ഇത് സംബന്ധിച്ച് ജില്ലാ കളക്ടര്ക്ക് നിവേദനം നല്കിയിരുന്നുവെന്നും പീരുമേട്, കുട്ടിക്കാനം എന്നീ സ്ഥലങ്ങളില് ടൂറിസം വികസന പദ്ധതികള് നടപ്പിലാക്കണമെന്ന് നിവേദനത്തില് ആവശ്യപ്പെട്ടിരുന്നുവെന്നും പ്രസിഡന്റ് പ്രകാശ് ഇഞ്ചത്താനം, ജനറല് സെക്രട്ടറി കെ.സോമന്, ട്രഷറര് അരുണ് ജോസഫ് എന്നിവര് പറഞ്ഞു.
ഇടുക്കി ജില്ലയിലെ ചെറിയ സ്ഥലങ്ങള്പോലും ടൂറിസം കേന്ദ്രങ്ങളായി പ്രഖ്യാപിച്ചപ്പോള് ഏറ്റവും പ്രധാനപ്പെട്ട പരുന്തുംപാറ, കുട്ടിക്കാനം, പീരുമേട് എന്നീ കേന്ദ്രങ്ങള് അവഗണിക്കപ്പെടുകയായിരുന്നു. ഇവിടെ എത്തുന്നവരില് ബഹുഭൂരിപക്ഷവും ആഭ്യന്തര ടൂറിസ്റ്റുകളാണ്. യാതൊരു അടിസ്ഥാന സൌകര്യങ്ങളും ഇവിടെ നിലവിലില്ല. പ്രകൃതിയുടെ തനതായ ഭംഗി നിലനിര്ത്തിക്കൊണ്ട് ഇവിടെ വിവിധ പദ്ധതികള് നടപ്പിലാക്കണമെന്നും ടൂറിസം കേന്ദ്രമായി പ്രഖ്യാപിച്ചാല് മാത്രമേ ഇതിന് പരിഹാരം ഉണ്ടാകുകയുള്ളൂവെന്നും പീരുമേട് റിസോര്ട്ട് ഓണേഴ്സ് അസോസിയേഷന് നിവേദനത്തില് ചൂണ്ടിക്കാണിച്ചിരുന്നു.
പീരുമേട്, കുട്ടിക്കാനം എന്നീ സ്ഥലങ്ങളില് ടൂറിസം വികസന പദ്ധതികള് നടപ്പിലാക്കുന്നതിന് പഞ്ചായത്തുമായി ബന്ധപ്പെട്ട് ഭൂമിയുടെ ലഭ്യത പരിശോധിച്ചുവരികയാണെന്നും ടൂറിസം ഡെപ്യൂട്ടി ഡയറക്ടര് അറിയിച്ചു. പരുന്തുംപാറ ടൂറിസം കേന്ദ്രമായി പ്രഖ്യാപിച്ചതോടെ ഇവിടേക്ക് വിവിധ ടൂറിസം പദ്ധതികള് താമസിക്കാതെ എത്തുമെന്നാണ് പ്രതീക്ഷ. ഇതോടെ ഈ പ്രദേശത്തിന്റെ മുഖച്ഛായതന്നെ മാറും. കൂടുതല് റിസോര്ട്ട്, ഹോം സ്റ്റേ, സര്വീസ് വില്ലകള് എന്നിവ ആരംഭിക്കുന്നത് തദ്ദേശീയര്ക്ക് കൂടുതല് തൊഴില് അവസരങ്ങള് സൃഷ്ടിക്കുമെന്നും ഭാരവാഹികള് പറഞ്ഞു.
