തിരുവല്ല : സബ് കളക്ടറായി പാര്വതി ഗോപകുമാര് ചുമതലയേറ്റു. 2024 ബാച്ച് ഐ.എ.എസ് ഉദ്യോഗസ്ഥയായ പാര്വതി ഗോപകുമാര് എറണാകുളം അസിസ്റ്റന്റ് കളക്ടറായിരുന്നു. 2024 ല് സിവില് സര്വ്വീസ് പരിശീലനം പൂരത്തിയാക്കിയ ശേഷം 2025 മേയ് മാസത്തിലാണ് എറണാകുളം അസിസ്റ്റന്റ് കളക്ടറായി ചുമതലയേല്ക്കുന്നത്. ഏഴാം ക്ലാസില് പഠിക്കുമ്പോള് പിതാവ് കെ.എസ്.ഗോപകുമാറിനൊപ്പം ബൈക്കില് സഞ്ചരിക്കവേ അപകടം സംഭവിക്കുകയും പാര്വതിയുടെ വലത് കൈ നഷ്ടമാവുകയും ചെയ്തിരുന്നു.
ശാരീരിക പരിമിതികളെ മനക്കരുത്ത്കൊണ്ട് മറികടന്ന പാര്വതിയുടെ ജീവിതയാത്ര സിവില് സര്വ്വീസ് ഉദ്യോഗാര്ഥികള്ക്കും സാധാരണക്കാര്ക്കും പ്രചോദനമാണ്. പ്ലസ് ടു ഹ്യുമാനിറ്റീസില് മുഴുവന് മാര്ക്കും നേടി വിജയിച്ച പാര്വതി ബംഗളൂരു നാഷണല് ലോ സ്കൂളില് നിന്നും 2021 ല് നിയമ ബിരുദം നേടി. ഇതിനിടെ ആലപ്പുഴ കളക്ടര്മാരായിരുന്ന എസ്.സുഹാസ്, കൃഷ്ണ തേജ എന്നിവരുടെ കാലഘട്ടത്തില് കളക്ട്രേറ്റില് ഇന്റെണ്ഷിപ്പിന് അവസരം ലഭിക്കുകയും ഐ.എ.എസ് എന്ന സ്വപ്നം മൊട്ടിടുകയുമായിരുന്നു.
