പത്തനംതിട്ട : പുതിയ പാസ്പോർട്ട് അപേക്ഷ, പുതുക്കൽ തുടങ്ങിയ സേവനങ്ങൾക്ക് കേന്ദ്ര സർക്കാർ അന്യായവുമായി വർദ്ധിപ്പിച്ച ഫീസ് അടിന്തിരമായി പിൻവലിക്കണമെന്ന് കേരളാ പ്രദേശ് പ്രവാസി കോൺഗ്രസ് ജില്ലാ പ്രവർത്തക യോഗം ആവശ്യപ്പെട്ടു.
പശ്ചിമേഷ്യൻ യുദ്ധ സാഹചര്യത്തിൽ വിമാന ഇന്ധന വിലവർദ്ധനവിന്റെ പേര് പറഞ്ഞ് വിമാന കമ്പനികൾ അടിക്കടി യാത്രാനിരക്ക് വർദ്ധിപ്പിച്ച് കൊള്ളയടിക്കുമ്പോൾ അതിനെതിരെ യാതൊരു നടപടിയും സ്വീകരിക്കുവാൻ തയ്യാറാകാതെ പ്രവാസി ചൂഷണത്തിന് ഒത്താശ ചെയ്തു കൊണ്ടിരിക്കുന്ന കേന്ദ്ര സർക്കാർ പാസ്പോർട്ട് സേവനങ്ങൾക്ക് അമിത നിരക്ക് വർദ്ധിപ്പിച്ച് പ്രവാസികളെ വീണ്ടും ദ്രോഹിക്കുന്നത് അനീതിയാണെന് യോഗം ചൂണ്ടിക്കാട്ടി.
ഗൾഫ് മേഖലയിൽ ഉൾപ്പെടെ യുദ്ധ സാഹചര്യം നിലനില്ക്കുമ്പോൾ പ്രവാസികൾക്ക് കൂടുതൽ ദുരിതം ഉണ്ടാക്കുന്ന പാസ്പോർട്ട് ഫീസ് വർദ്ധനയും വിമാന യാത്രാനിരക്ക് വർദ്ധനയും പിന്വലിക്കുവാന് സര്ക്കാര് തയ്യാറായില്ലെങ്കില് ശക്തമായ സമര പരിപാടികൾ സംഘടിപ്പിക്കുമെന്ന് പ്രവാസി കോൺഗ്രസ് യോഗം കേന്ദ്ര സർക്കാരിന് മുന്നറിയിപ്പ് നല്കി.
സംസ്ഥാന ജനറൽ സെക്രട്ടറി സാമുവൽ കിഴക്കുപുറം യോഗം ഉദ്ഘാടനം ചെയ്തു. ജില്ലാ പ്രസിഡന്റ് മാത്യു പാറക്കൽ അദ്ധ്യക്ഷത വഹിച്ചു. സംസ്ഥാന ഭാരവാഹികളായ മോനി ജോസഫ്, കോശി ജോർജ്ജ്, ഷിബു റാന്നി എന്നിവർ പ്രസംഗിച്ചു.
